Susulu le “Moli o le Ava” i Sini

O le faaili logologoā o le “Moli o le Ava” ma le V&T Productions ua amatalia nei se suiga mataina ma le talafeagai i Sini i le tuufaatasia o se uluai koneseti faaposiva i se tau talafeagai ma lelei. O le tama pese faapitoa ia Richard Parker na valaaulia.
E $40 le tau o le ulufale i lea faamoemoe na faatumulia ai le Hall a le Serbian Community Hall i Plumpton i Sini. O le tau masani e iai isi faamoemoe o le $20 le ulufale e aofia ai le taumafataga mamafa (supper). O lea nofoaga ua amata tuli tasi e faamoemoe o le atunuu auā ua faasā tatou tagata i isi nofoaga masani e pei ona faia ai misa ma fusuaga pe a onanā i le ava malosi.
Ua suegata foi Halls ma ua sii maualuga ai foi tau o Fale faapenei i le va o le $2500-$3000AUD. O le Aso Toonai na tea nei na gasolosolo atu ai le toatele o le mamalu o le atunuu e maimoaina le koneseti a le “Moli o le Ava” lea sa malaga faapitoa mai a le susuga ia Richard Parker mai Melepone.
O le itula e ono i le afiafi na amata ai ona lolofi atu le ausisiva, ma o i latou na vave faatau pepa a o faagasolo le vaiaso ma luma atu, na maua se tau pa‘ū e $30.00 e maua ai le sapa, ae $40.00 mo i latou sa totogi i le faitotoa i lea lava po.
O le tofa ia Lealaifola Lauvale Su‘a, o le faatonu o le leitio “Samoa Laalaa FM 99.9” sa avea ma Fofoga o le po. Na mafai ai foi ona faafofoga le mamalu o le atunuu i le siufofoga mālie o le tofa ia Lealaifola i taimi sa vavae ai foe o faafiafiaga.
E ui i le telē o lenei fale, ae sa faatumulia uma nofoa i le tusa ma le 450 i le 500 tagata. Na vaaia le matuā faafiafiaina o le mamalu o le aofia auā ua fai si umi e lei toe faia se siva tele faapea.
E ioe tagata ua leva ona tatau ona sii tau o pepa siva auā ua taugata uma Halls ma inisiua aemaise le tigaina i le kukaina o meaai. Na saunoa se tasi na fesiligia e le Samoa Times e tusa ai o po faapenei, ma ia faaalia ai, “O koneseti a le aupalagi, a taugofie mai le tau o se pepa ulufale pe ā ma le $90, ae leai se sapa toe faasā le auina atu o le ava malosi. Peitai o siva ma koneseti a Samoa ua leva tele ona alu i le $20.
Na vaaia le lolofi atu o tagata e tapue ata ina ua pese le alii o Richard Parker. O pese a Richard Parker i lea po sa filifilia mai i molimanao a tagata ma ana pese taatele. E le gata i lea o le mālie o le Rap a le susuga ia Alesana lea foi na emo i ai le meapueata.
Na saunoa faafetai le Pule o le faaili ma o le faatamā foi o le Moli o le Ava ia Iona Keti, i le lagolago a le atunuu. Na lē ofi le foloa i le mālie o pese a le faaili i le susuga ia Jack, Tash, Osiana, TOMZ, Shay, Chrizzy, Teeza ma Siu aemaise Jay Pupualii. Momoli foi le faafetai tele a le susuga a Richard Parker i le aofia ma kamupani ma leitio na lagolagoina lenei po.