Suipi Leni Mamea i le Krazzy 4 Dance

E valu masina sa faagasolo ai le tauvaga ua faaigoaina o le Krazzy 4 Dance i luga o le Triangle TV. I totonu o lea valu masina sa tulimatai ai e le toatele le mataina o lenei foi tauvaga, aemaise ai o le suiga ua iai foi tulaga tau siva i lenei talutalu fou o le soifuaga. E tele ni ausiva sa tausinio i lenei tauvaga a o faagasolo mai i le valu masina, ma sa filo ai lava ma le tama Samoa e toatasi le susuga Leni Mamea ma lana ausiva lea e auai faatasi ai ma nai ona alo, le tamaitai o Jireh ma le alii o Jiroh. O le auai o le susuga Leni ma nai ona alo o se vaaiga tele lea sa taulai i ai le maimoa a i latou uma sa auai i lenei tauvaga, aemaise ai o le silamaimoa a le faitau afe ma afe o tagatanuu o Niu Sila o loo mafai ona matamata i le taimi e faasalalau mai ai i luga o le televise lenei faamoemoe.
O le po o le Aso Toonai na sei mavae atu nei sa faia ai le tauvaga mulimuli ina ia sailia ai se manumalo. I lea tauvaga faaiu na matua faatumulia ai le fale o le TelstraClear i Manukau i le mamalu ma le aofia na faatasi atu ina ia tulituliaupu le iuga o le tausinioga. E fitu ni ausiva sa saili i ai se manumalo i lea po ma i lea toafitu sa auai se tasi o ausiva Samoa ua faaigoaina o le 685, faatasi ai ma le susuga Leni ma nai ona alo. O isi ausiva e mai Fiti, Initia ma papalagi. Na mataina le faafiafiaga a le ausiva 685 ma le latou taumafaiga peitai na lei tuumamaina foi e le susuga Leni ma nai ona alo. Sa faapea foi isi vaega sa auai i ausiva toatele aua na maualuga le tulaga na oo i ai a latou tapenaga.
Sa ui i le mananaia o ausiva uma sa iai, ae na tasi le faaiuga a faamasino i le tama Faleata ma sola ai loa le alii Toamua o Leni ma nai ona alo ma le siamupini ina ua tusi aao i ai le iuga o le po. O le molimau a le tusitala ua talafeagai ai le manumalo a le susuga Leni ona o le lelei ma le matagofie o le latou faatinoga ma nai ona alo. Na patipati ma feei le toatele o Samoa na iai i lea po ina ua lau mai le faaiuga ua suipi le tama mai Otahuhu aua o ia o se tasi o paaga a le toatele e ala lea i luga o lana tautua i le alaleo faasalalau a le Radio Samoa 1593AM.
E tasi le afe tala se faailoga tupe sa tauaaoina atu i le susuga Leni ma lona aiga atoa ai ma se tusipasi e faamaonia ai le avea o i latou ma siamupini o le Krazzy 4 Dance o le 2009-2010. E tasi le afe tala foi ni isi o faailoga tau faamanuiaga sa faapea ona o latou mauaina, e aofia ai pepa e faamaonia ai le talaina i tua o oloa, ma isi o vaega e faaaoga i totonu o le aiga. O le susuga Leni Mamea e le toe tau faailoaina i le toatele o si o tatou atunuu ona o lana taleni faasalalau, peitai o lea foi la ua faamaonia nei o loo iai se tasi o taleni ua faamanuia ai lona soifua e le Atua, e ala lea i le faafiafia i vaega tau faafiafiaga