Ua teena e le Komesina o Leoleo, Papalii Lorenese Neru se talosaga a ni matua o ni alii e aooga i le Kolisi o Sagato Iosefo i Alafua ma le Kolisi o Avele i Vailima, ina ia toe faaui i tua le mataupu ua tulai ai nei ia alii aoga i luma o le Faamasinoga Faaitumalo i le faaiuga o le vaiaso ua tuanai atu.
O moliaga o le faaoolima, le fufusu i nofoaga faitele ua oo atu ai le toatolu lea i le faamasinoga. E toalua alii mai le Kolisi o Sagato Iosefo ma le toatasi mai le Kolisi o Avele.
Faaalia i luma o le faamasinoga e sui o le Matagaluega o Leoleo o le teena e le Komesina o Leoleo o lea talosaga ona ua manatu le Matagaluega ua tulai soo mai pea le faafitauli lenei o le fufusu o tama aoga i nofoaga faitele ma ua le o toe iai se avanoa e onosaia ai e le Matagaluega ia ituaiga amioga.
O le faamatalaga na maua e leoleo e faapea o se feeseeseaiga i le va o nei alii aoga a o faatali le pasi agai i Vaitele na amata atu lava i Fugalei i le fale faatali pasi ae amata le faigamalaga a le pasi ae amata vevela foi i ina ma felafolafoaiga a le toatolu lea ma iu ai lava ina fufusu i totonu o le pasi a o tumu le pasese.
O le faamatalaga a le Sui o le Matagaluega o Leoleo o loo talia ni faamatalaga tusitusia mai i Kolisi e lua o Sagato Iosefo ma Avele faatatau ia i latou ua molia atu ma e le mafai ona faia se isi faaiuga pe fautuaina foi ni faasalaga o nei alii sei vagana ua maua atu tusi nei mai kolisi e pei ona taua.
Faaalia e le Alii Faamasino o Vaepule Vaemoa Vaai o le a tuu atu le mataupu mo vaiaso e tolu e talia ai se faamatalaga a kolisi e lua ua aafia ona faatoa mafai foi lea ona faia i ai se faaiuga a le Faamasinoga Faaitumalo i lea mataupu.
O le feeseeseai o tupulaga aoga i nofoaga faitele lea lava na iu ai ina aafia le taulaga o Apia i se fusuaga na tulai mai i le va o le Aoga a le Don Bosco ma leoleo i le tausaga na tea nei. Na faapea foi ona taua ai le igoa o le Kolisi o Avele.
Na lavevea leoleo i lea faalavelave i le tausaga na tea nei, taei uma ai faamalamalama o nisi o taavale aemaise o faamalamalama o nisi o ofisa tetele i le taulaga o Apia talu ai tauaiga maa a tama aoga. Na faapea foi ona faatopetope ai se teineititi sa aoga i le Kolisi o Leifiifi aua sona taotoga i Niu Sila ona o le matuia tele o ona mu ina ua togi e se tasi mai se tamai taavale na ui ane i ona luma a o faatali pasi ai i Fugalei, i se fagu na iai ni vailaau ua fafau ai se pomu.
O le iuga o lea vevesi na taofia uma e leoleo tamaiti aoga faapea e na fesoasoani ia i latou i le faatupuina o ia vevesi ma taofi ai loa e le Malo le toe faia o taaloga afeleti a aoga maualuga.
O lea faatoa toe tatala i lenei tausaga nei tausinioga ae ua faasa ai Don Bosco, le matata eseese a le Katoliko i Lotopa, ona toe auai i Taaloga Afeleti a Aoga Maualuga i totonu o le atunuu.
Ua faagasolo tausinioga a sone e fili ai ni au mo le sailiga siamupini o taaloga afeleti o lenei tausaga, ma o sone ua maea a latou tausinioga na molimauina ai le filemu o ia taumafaiga ma e leai ma se vevesi na tulai mai ai. Peitai o nofoaga faitele la nei ua vaaia ai ia feeseeseaiga.
I le pitolaau a faiaoga ma ulu o aoga taitasi, na faalauiloa lava i tausaga ua tuanai soo se tama aoga lava e maua mai o loo faatupu vevesi i le taulaga ma isi nofoaga faitele, o le iuga lava e ave i ai o le faatea ese ma le aoga, peitai talu ona amata faalauiloa lea tulaga, o lea faatoa toe vaaia lea o ni fusuaga i le va o tama aoga o ia aoga maualuluga.
Ua tele foi taumafaiga a ulu o aoga aemaise i le Kolisi o Avele ma le Kolisi o Sagato Iosefo, ina ia faatautaia faaleleiga i le va o tama aoga, ae foliga mai ua na o le taimi lava ua faatautaia ai ia feiloaiga e filemu ai, ae o loo tulai mai pea fusuaga i le Maketi i Fugalei, ae sa tele lava ina tulai mai i Savalalo i le nofoaga o le Flea Maketi lea e tele ina fai ai tuliga a tama talavou i le va o ia faleoloa i Savalalo. O lea la ua tele ina agai tagata sa masani ona afea Savalalo i le Maketi o fua o faaeleeleaga i Fugalei aua lava le alofia o nei vevesi ma o se faamasinoga muamua lenei e faatatau i vevesi a aoga ua tulai mai talu ai le taofiga o tama o le Matata Eseese o le Don Bosco i le tausaga na tea nei.
