‘Ou te lagona le loto maualalo ona o le faaeaea maualuga ua ou tauaaoina ai lenei faailoga. O taaloga o se matafaioi aogā ma se uo mamae, e faatupu faamoemoe i le tupulaga talavou o loo taumafai e tosina mai, ina ia mafai ai ona faatāua taleni ua faaoloaina ai i latou. Aua ne‘i faatagaina le faatauvaa o lou siosiomaga na amata mai ai, ma tulaga e faavaivaia oe. E mafaia mea uma pe a loto i ai….’
O se lagona faaalia lena o le alii o Carlos Ulberg, a o ia saunoa e talia le faailoga na tauaaoina mo ia.
O le faailoga lenei na tauaaoina ma faatupeina e le Pulega a Aukilani (Auckland Council) e tauala mai ia latou auaunaga faafaufautua mo tupulaga talavou (Youth Advisory Panel). Ua ta‘ua lenei faailoga o le ‘I am Auckland’ award. O le alii o Carlos Ulberg, e luasefulutolu tausaga, e iai lona pito Samoa, Maori ma Siamani (German).
Na amata mai lenei alii ise olaga faigata ma le mativa, aemaise o le tele o aiga (foster care) na latou tausia lenei alii ona o le sauāina i totonu o lona lava aiga, ma le tele o faaosoosoga ua lofia ai tupulaga talavou, i fualaau faasāina (drugs) ma le ‘ava malosi.
E ui i nei faafitauli uma sa feagai ma Carlos i le amataga, ae o lona faatuatua i le Atua aemaise o lona naunau ina ia faalautele le taleni ua ia umia, e ala i taaloga, na faamaoni lava le Atua ma tauia le taumafai malosi o lenei alo Samoa. E iloa tele le susuga ia Carlos i tulaga tau faipelē ma fusuaga faapolofesa.
O lona naunau tele i lana taaloga, sa ia faamavae ma fulitua ai i lana galuega sa faigaluega ai, ae faatūina se faalapotopotoga tuma‘oti ua ta‘ua o le Carlos Ulberg Trust. O le faamoemoe autu o lenei taumafaiga, ina ia mafai ona atinaeina ma faatupu faamoemoe i tupulaga talavou, e ala i taleni ma le tomai tau taaloga ua faamanuiaina ai i latou e le Silisili Ese.
