Siamupini le Waratahs i le Super Rugby mo le taimi muamua

Ua mae‘a le Super Rugby o le 2014, ua uma foi masalosaloga ma taumatega o le taamilosaga ina ua ili le fa‘ili mulimuli a le laufali, manumalo le Waratahs i le ‘ai e tasi, 33 i le 32 a le Crusaders.
O se taaloga o taumatega pe tua ma ni ā, auā na fesiligia se faaiuga ona e tau fai finau uma itu e lua, afai ae manumalo le Crusaders o lona uiga, o le taimi muamua lea o le a manumalo ai i le taamilosaga Super Rugby talu ona suia i le Super 15, ae ona o lea ua suipi le Waratahs i le faaiuga o le vaiaso, o lona uiga lea faatoa ea le pologa o si ‘au talu ona fetaui ma le Crusaders i finals ua maea talu ona saili siamupini ‘au nei e lua, ma o le taimi muamua foi lea ua tofo ai si ‘au a le Waratahs i le suamalie o le lagona manumalo.
Pei ona silafia, o le taimi muamua foi lea ua faia ai se finals o le Super Rugby i laufanua o NSW, tosina i ai le silia ma le 62,000 le au tapuai i le taaloga na se‘i mavae nei, o se faitau aofai pito i maualuga le fuainumera o tagata matamata i taaloga a NSW talu le 100 tausaga talu ai.
Na manino lava i taaloga mulimuli o le semi finals a le Super Rugby le faigata tele o le sailiga siamupini o le a alo atu i ai le Waratahs ma le Crusaders ona e tau fai malolosi uma ma vave le gaioi. O le manumalo o le ‘au a le Waratahs ua manatu nisi ua alagatatau, e ui i le finau o le taaloga i nai minute mulimuli, ae ona sa oso malosi le tau ‘ai a le Waratahs i le amataga, 14 i le leai a le Crusaders i minute o le ‘afa muamua o le taaloga.
O aa o sala na aaina e le alii o Bernard Foley fafao lelei i le pou o le isi lea faaopOopo tele i le manumalo o le Waratahs.
Peitai e lei nofonofo‘ai ai foi le Crusaders ae tulei mai le foueki i le 70 mita mai le laina e sikoa ai le Crusaders, osofai mai ai le lanu mumu ae faatini e le latou flanker Matt Todd ma laasia ai loa le laina sikoa i le 18 minute o le ‘afa muamua o le taaloga.
Na manuia le aa Dan Carter mo se ‘ai faaopOopo mo Crusaders, a o lei toe fafao foi le isi kiki a Foley, ova le aa o le sala, ‘ai o le taaloga, Waratahs 17 i le 7 a le Crusaders.
Na lē mafai ona faaauauina e Dan Carter le taaloga ona o se manu‘aga, sui mai loa Collin Slade lua aa o sala na ova, ae lei tuuaunoaina e le Waratahs nei avanoa ma toe fafao foi le isi kiki i le pou, 20 ai lea i le 13 a Canterbury.
Peitai toe laasia lava e le uigi Nemani Nadolo le laina sikoa, tutusa ai ‘ai o le taaloga 20 i le 20. Malosi tele le finau ma mataina le taaloga, seia oo lava i le lima minute mulimuli o sili pea ‘ai a le Waratahs 30 i le 29 a le Crusaders, toe faasala lava le lanu moana offside, ili le fa‘ili a le laufali, Slade kiki le polo i luma o le pou ma ova, sili ai loa ‘ai o le Crusaders ae toe lua minute o totoe o le taaloga.
Atonu sa iai se masaloga o McCaw ma le vaega ua lava ia lea, ailoga a toe mafai e le Waratahs se ‘ai faaopopo i toe minute mulimuli o le taaloga, ae ua faateia i le toe sala lava.
Na taumate le ova ma le lē ova o le kiki a Foley i le mamao pe tusa ma le 45 mita le va agai i le pou, peitai e lei toe iai se masalosalo o se tasi i le faaiuga ina ua fafao lelei lena polo i le va o pou, ma manumalo ai loa le Waratahs mo le taimi muamua i le tala faasolopito o le Super Rugby.
Ona tali ai lea o le tatou fesili na avatu i le lomiga talu ai, ua manumalo le moa fanua, ma le faamoemoe ua lava tapena ni lalaga auā le tatou sii pe a taunuu mai i laufanua si a tatou Crusaders.