Ua mae‘a nisi o talosaga sa suesueina e le faamasinoga na fesiligia ai le tulaga agavaa o nisi o sui faatutū o le palota ma ua aumai faaiuga o lea ua lē mafai ona tauva sui e toalua o le vaega faaupufai o le Tautua Samoa, ae toatasi le sui o lea pati ua faaauau ona tauva ina ua toe faaui i tua se mataupu sa faasaga i ai le afioga ia Tiatia Maposone Tiatia.
O le afioga Le Tagaloa Pita, ma le fetalaiga Tuula Kiliri ua faamalieina le faamasinoga i mau tetee na tuuina atu e lē faamalieina le aiaiga o le monotaga e faia i le tolu tausaga i totonu o le nuu.
I le itu a le vaega faaupufai o le HRPP ua lē manuia le avea o Fuatimau Maumea Leniu ma sui tauva o le Vaimauga i Sasae ona ua lē faamalieina le aiaiga o le nofomau i Samoa i le tolu tausaga ma le faia o le monotaga i le nuu.
E faapena foi le afioga Leoo Tautalatasi Dr John Adams ua lē manuia lona faamoemoe e tauva mo le nofoa o Aleipata Itupa i Luga, faapea ma le tofa Fiaola Iosua Lole ua lē mafai ona tauva mo le nofoa o Lotofaga ona o aiaiga o le tulafono i se tasi e faamaonia se moliaga tau solitulafono ae o lona faasalaga o le oti, poo le fā tausaga ma sili i le falepuipui.
O Fiaola na ioe i le moliaga o le avetaavale faatamala na oo ai le maliu i se tagata peitai e lei faia se faasalaga faafalepuipui ae sa faasala i le ono masina e nofo vaavaaia ai ma le selau itula e galue fua ai mo le lelei o tagata lautele
O le sui tamaitai o Faaulusau Rosa Duffy Stowers ua faamaonia sa faia lana monotaga e tusa o aiaiga o le tulafono o faigapalota, ma ua tafea ai le talosaga na faaulu e Laauli Polataivao Leuatea Schmidt mai le itumalo o Gagaifomauga N
umera 3.
O le afioga Leota Leuluaialii Ituau Ale le sui tauva o le Anoamaa i Sisifo ua faaauau ona tauva ina ua toe faaui i tua le tagi na faaulu e se tamalii o Solosolo ma alii ma faipule o le afioaga.
E iva talosaga na faato‘ai i le faamasinoga peitai e na o le fitu na faaauau ona fofogaina ina ua toe ave i tua le isi lua. Na faatoa faaui i tua le mataupu faasaga i le afioga Leota Leuluaialii Ituau Ale i le aso na faatulaga e suesueina ai le tagi o le lē faia o lana monotaga.
O le mataupu lenei i le monotaga ua faaalia ai e le afioga Leo’o Tautalatasi e tatau ona toe silasila i ai le Palemene ona e iai vaega e ao ona toe asiasi i ai.
“Afai o le tolu tausaga o loo manaomia e faia ai le monotaga e amata mai ia Fepuari o le tausaga 2013 e oo mai ia Fepuari o le tausaga nei (2016), e faapefea la isi monotaga na fai i tua atu o tausaga na, ma le isi itu o le monotaga e fai i le nuu, e lē na o mea o loo mananao mai i ai ae e oo lava i faalavelave e pei o maliu ma faaipoipoga poo saofai o isi na tautua faifai pea”.
O le afioga Faaulusau Rosa na ia faaalia lona agaga fiafia ua palasi atu se isi avega sa faamamafa i ona tau‘au a o lei faia le palota, ina ua togi i fafo le tagi a le Fofoga Fetalai.
Peitai o lana foi tuualalo i le Malo ia toe silasila i aiaiga o le monotaga poo talafeagai ma le ituvai o tamaitai e fia tauva i faigapalota e sailia ai tofi o le Palemene.
