O le faigapalota tele a le atunuu i le faaiuga o le vaiaso nei 4 o Mati 2016 o le faataotoga mai o itumalo e 49 ma sui tauva o vaega faaupufai e lua le HRPP ma le Tautua Samoa o le a taufetuli mai ai, e manino mai ai e toe manumalo le vaega faaupu fai e puipuia aiā tatau a tagata le HRPP.
E fua lea i le 21 o itumalo o le a tauva ai sui o le Tautua Samoa ae 28 mo le HRPP. A fua foi i le aofaiga o sui tauva o loo tamomoe i fu‘a a nei vaega faaupufai e lua, e 83 mo le HRPP ae 21 mo le Tautua Samoa.
Peitai e to‘a 20 sui tauva tutoatasi ua faaalia e le Tautua Samoa o loo tauva ma le faamoemoe a manumalo o le a avatu le latou lagolago.
O le HRPP e 40 ma ona tupu foi ana sui tauva tutoatasi. O le faiga o sui tutoatasi ona e mafai ona suia le latou lagolago i se vaega faaupufai e fia lagolago i ai tusa lava poo ā tuugatala ma pulega o pati e lua i le taimi o lumanai le faigapalota.
O lea ua mautinoa nofoa e fā o le HRPP amata mai lea numera i le lē palotaina o le tofi o Satupaitea lea na tapuni le faauluina o sui tauva e na o le afioga Lautafi Fio Selafi Purcell le sui na faaulu.
Peitai o iuga o nisi o mataupu sa ave i le faamasinoga sa fesiligia ai le agavaa o nisi sui tauva, ua lē palotaina ai le tofi o Lepa lea o loo umia e le afioga i le Palemia susuga Tuilaepa Sailele Malielegaoi lea ua lesitala nei i lona suafa Auelua ma le isi ona suafa o Fatialofa.
Ua lē palotaina foi le tofi o Lotofaga lea o loo umia pea e le afioga Fiame Naomi Mataafa, ma le lē palotaina o le tofi o Aleipata Itupa i Luga lea o loo seei ai le afioga Fagaivalu Kenrick Samu ua lesitala nei i lona suafa Amituanai.
O le fā o nofoa mautinoa ua umia e le HRPP a fua i le 28 o itumalo ua na o o ona sui o le a tauva mai ai o lona uiga a toese le fā nofoa ua mautinoa nei o lona uiga e 24 itumalo o le a palota e tagata ua na o sui faatutū o lea vaega faaupufai.
Se‘i vaganā sui tutoatasi o loo tamomoe mai i itumalo nei e faatoa iloa le sui manumalo i le faaiuga o le palota. E lē mafai foi ona mautinoa o itumalo e 21 o le a tamomoe mai ai sui o le Tautua Samoa o le a latou toe maua auā o loo iai ma sui o le HRPP ma sui taitoatasi o loo lagolago i lea vaega faaupufai.
O le a tatou faatali i le faaiuga o le vaiaso poo le ā se faaiuga o le a iai, ae o le itu mautinoa e fua i itumalo ma sui tauva o le a taufetuli mai ai sui o le Tautua ma le HRPP, e leai se suiga o le pulega o le Malo se‘i vaganā ua toatele ni sui tutoatasi e manumalo mai ae lagolago uma i se numera o nofoa e maua e le Tautua Samoa.
