Suia le lumanai o totoga faamealofa

So o se vaega lava o lenei soifuaga ua tele lava ina vaaia suiga ua iai nei e pei o le suia e masini o galuega i fale gaosi oloa ma le faafaigofie e upega tafailagi (initaneti) sailiiliga ma togafitiga. E ui lava i foafoaga mamana a le silisili ese ua mafai e fomai ma saienitisi na fausia.
O le tulai mai o le faiga fou o le 3D e gaosia ai totoga e pei o le fatu, fatuga‘o, māmā ma ivi ma sooga o le tino faaopoopo i ai ma le ono faatagaina o sela e aumai i stem cell e ono suia ai le soifuaga faafomai i le isi sefulu tausaga.
I Ausetalia nei ma le tele o atunuu tamaoaiga, e iai se feagaiga ma tagata uma o loo umia laisene avetaavale e talia ai pe leai foi le faimeaalofa (donate) o totoga pe a maliu pe afaina foi le soifua i luga o faalavelave tau taavale faafuasei e aunoa ma se silafia.
O lenei faiga ia malilie ai tagata e tuuina atu o latou fatu, māmā,fatuga‘o ma le fai‘ai (tulou) pe a mavae lenei soifuaga e ola ma togafitia ai se tasi o loo moomia. I nisi o taimi e tasi se tagata e maliu ae soifua ai se toatolu pe sili atu foi i totoga e faimeaalofa ai.
O le Iunivesite a Wollongong ma le Falemai i Melepone a le St Vincent lea ua faailoa aloaia mai le amata nei o tapenaga faaiuiu o le faataitaiina o le fausia o totoga ma ponaivi ma sooga e auala i le 3D imaging ma o le isi lima tausaga ua faaaogāina aloaia ma e aulia atu le 2023 ua faaaogāina e falemai uma o le lalolagi.
O lenei ata faailo mai alii fomai popoto o le a fai ma mapusaga o le toatele o gasegase aemaise tamā ma tina matutua o si o tatou atunuu i Ausetalia nei ma isi atunuu uma o le a faaaogāina nei faiga fou.
I tausaga e tele ua tuanai atu e toatele nisi o tatou tuaa ua fai i lagi le folauga. O lenei vaitau i le mamalu o le atunuu i Sini nei e toaitiiti lava i latou e sainia nei feagaiga mai le Falemai ma le RTA e faameaalofa ai itutino (organ donor).
Saunoa le Afioga i le Alii Pule o le Fanaena i Sini ia Tauo Siaki Valu Toomata, “O le itu lea e tuai ai le teuina o le tele o maliu auā e faatalitali i sailiiliga a le Coroner faapea le faamautuina mai o ripoti a fomai pe foai itutino o lē ua maliu.”
“O le a faigofie foi la ma vave toe tapenaga a lo matou auaunaga pe afai e taunuu mai lea faiga fou e gaosi lava totoga ma tele na lē toe moomia ai sainiga feagaiga ma nai tagata ae lei uma lo latou soifua.”
E lei mautu mai i le taimi nei se aofaiga o tau e maua ai nei tautua i le isi sefulu tausaga. “O nisi foi e mafua le fulitua i lenei itu tāua o le ofo o totoga (donor) auā o le auala e faaaogāina ai meafaigaluega e tuueseeseina ai le tino maliu ma vaega e moomia mo taotoga e laveai ai tagata o loo soifua,” o le saunoaga lea a Tauo Siaki Valu Toomata.
Na toe faaopoopo Toomata, “Ou te fautuaina lava foi o tatou tagata i le aua le taooto se‘i tulou, auā e lē gata i le umi ma taugata ai tapenaga ae o le afaina ai o foliga vaaia o lē ua maliu ae lei mae‘a toe sauniga.”
Na saunoa foi le sui ia Aiono Sefo e galue i lea falemaliu, “Mo tatou tagata e toatele lava e finagalo e aua le faatasinaina tino e ui lava i le maliu e ese mai papalagi.” O lenei mataupu o le a tuuina atu lava i le tagata ma lana mavaega i lona aiga a o lei oo mai le valaau paia.