O lona tuaa le afioga Leleisi‘uao Palemene sa seei i le nofoa o le itumalo o Palauli i Sasa‘e, mo se taimi umi i nisi o paeaiga a le Palemene ua mavae.
Ua tuumalo le afioga Leleisi‘uao Palemene, ae o se tasi o ona alo le afioga Misa Risati ua tasi nei iai le finagalo o alii ma faipule ma le afioaga atoa o Vailoa i Palauli e avea ma o latou sui tauva mo le vaega faaupufai o le HRPP i le faiga filifiliga a Samoa i le tausaga fou.
O le finagalo autasi o le nuu na fofoga i ai Samoa i luga o alaleo tau leitio ma le televise i le vaiaso ua tuanai atu nei.
O nisi o matai faiupu o le afioaga na latou momoli le finagalo autasi mo le faasalalauina e silafia ai e le atunuu i le TV1 ma le leitio o le 2AP i le Aso Lua na tea nei, aso 7 o Tesema 2010.
O le suafa foi o le sui faatu ia Misa Risati Leleisi‘uaso ua faasalalau mai i le lisi o sui faatutu a le HRPP mo le palota o le 2011.
O le faamaoniga lea ua mae‘a ona momoli aloaia le sui tauva a le afioaga o Vailoa o Palauli e pei ona faaalia e se tasi o matai o le nuu.
“E sese nisi o faamatalaga o loo salalau nei e faapea o le sui faipule o loo iai nei o se tasi o matai o le matou nuu, ua tasi i ai”.
O le finagalo lea o le matai ma lana faamatalaga ua uma ona ave le fautuaga i le tofa Toluono Feti o loo tu nei i le tofi, ina ia tapuai ae lafo le avanoa i le afioga Misa. Peitai o loo tumau le sauni o lea foi matai o le afioaga i le faigapalota.
Na faaalia o le tuai ona oo atu o Toluono Feti e momoli atu le tofi o le itumalo, ma faia foi se feiloaiga e pei ona masani ai i isi tofi o le itumalo pe a lata ina mae‘a se paeaiga faapalemene, o le mafuaaga lea o le faia loa o le faaiuga a le nuu e lagolagoina le afioga Misa.
I le itumalo atoa o Palauli i Sasa‘e ua mautinoa e toalua isi sui tauva mai isi afioaga o le itumalo o Vaitoomuli ma Fa‘ala.
O sui uma foi ia e tauva mo le HRPP, seia vagana Toluono Feti e lē o mautinoa pe tauva faatutoatasi pe tauva i le vaega faaupufai o le Tautua Samoa.
O se tasi lea o atugaluga o matai o Vailoa Palauli ona o loo iai tala‘iga ua ta‘ua ai o Toluono e tauva mo le HRPP, peitai ua tasi le finagalo o le afioaga o Misa Risati lo latou sui tauva mo le HRPP.
