E faamamalu e le Ekalesia ma le Talalelei le aganuu a Samoa, ae faamalumalu foi le aganuu a Samoa i le ekalesia ma le galuega a le Atua.
O le ata manino lea o loo faavae ai le faiga o lotu ma ekalesia, e fai atu i totonu o afioaga ma alalafaga i totonu lava o Samoa.
O le mafuaaga foi lea e malosi ai pea le faamoemoe ma le faagaioiga o soo se ekalesia lava e sunui atu sona lala e totō i le atunuu ma le faamoemoe e ola ma tupu mafalā i le savaliga mo le lumanai.
E lē faatamala le pule a alii ma faipule, faapea foi pulega faalenuu ma le faamatai i le puipuiga o le aufaigaluega e autovaa ane i totonu o nuu ma afioaga, ona o le tausia ma le vaaia o aulotu ma ekalesia. E faauouo e le faiganuu le Talalelei ma le finagalo o le Atua.
O le itu i le tino o le galuega ma lona faatinoina, o matafaioi ia a matai ma le lautele o le afioaga, a o le itu faaleagaga, mo le fafagaina o agaga o le nuu ma ona tagata, o le pitolaau lea a le faifeau ma le aufaigaluega a le Atua. E manino ma malamalama lelei le nofolua ai o le Talalelei ma le Aganuu.
E iai foi ona tuaoi ua mae‘a ona faataoto ma lima ta‘ita‘ina ai tagata uma, e mafua ai ona faapea faaupuga e masani ai, E o faatasi le Talalelei ma le Aganuu. Pe faapea ane foi, E malu le Talalelei ona o le Aganuu, ae mamalu le Aganuu ona o le Talalelei.
O faafitauli ma fita o le galuega i le nonofo ai i le va o le Talalelei ma le Aganuu, e mafai ona fofo alamea ma masuiga mālie lava i le lotoifale o le nuu, ma lana Feagaiga poo le Faifeau, e mulimuli taunuu ane se faaiuga mai nofoaga autū ma ta‘ita‘i o lotu ma ekalesia, ae muamua lava faaaogā le aganuu e fai ma auala laupapa i le filemu, ma le Talalelei e tapa e faamamaluina ai se faaiuga ona uma lea.
E lei mamao tele atu ona toe taliu le tamā o le Ekalesia Katoliko mai Samoa, Aki-Epikopo Alapati Mataeliga i sana malaga faapitoa na malaga mai ai, ona o le sailimalo ma le taumafai e usu ma fai le faaleleiga o se faafitauli faalelotoifale o le Matagaluega Samoa i Ueligitone.
O le tāpā o le susuga i le Aki-Epikopo mai Samoa, talu ai ona e lei faigofie ae sa vao eseese pea le mamalu o le aufai uta ma le au fai tofa a le atunuu agai lava i le mataupu sa tulai i se vaitaimi e lei mamao.
E ui ina sa toe taliu mai le ta‘ita‘i o le galuega i Ueligitone ma Niu Sila, ma toe fofo le manu‘a, peitai e lei atoatoa lava ona manuia.
O le ala ma le autū lea na malaga mai ai le tamā i Samoa, ona o le manaomia o se isi malosiaga i le va fealoai ma le aganuu o loo faamalumalu i le galuega a le Atua, e fai ma fofō ufiufi o le mataupu, ma toe faafoi ai le agaga e tasi ma le galulue faatasi o tagata lotu ma ana auauna ta‘ita‘i o le galuega.
O se fiafiaga sili lea i le toatele o le au tapuai ma tagata lotu, ina ua mafai ona feiloai ma soalaupule i le gagana Samoa ma le faaaogāina o le faiva o Pule o le Faaaloalo, atoa ai ma le tofa faale-Atua, e auli ma toe faamafolafola ai nai vaega sa osofaia ai le filemu moni i le va o le au Kerisiano.
E ui lava la ina o loo iai pea nai vaega laiti o loo galulue malosi pea i ai le aufaigaluega a le Atua mo le faaatoatoaina o le galuega fesoasoani, peitai o loo malosi le faamoemoe, o le faamanatuina o le pepe o le Kerisimasi o lenei tausaga, o le a avea ma atoaga o faamoemoega ma talotaloga a ta‘ita‘i ma tagata lotu uma, mo le agai i le lumanai.
O se feeseeseaiga sa tulai mai i le lotoifale o ekalesia Samoa i le matagaluega ona o ni tofiga sa faia e le ta‘ita‘i papalagi poo le Aki-Epikopo o loo nafa ma le galuega i Ueligitone ma Niu Sila.
O lea vevesi sa oo ina va ai le fogavaa ma vaeluaina ekalesia taitasi e silia ma le sefulu, ona o le teena o se faaiuga sa faia e le ta‘ita‘i, peitai sa tumau pea le lagolago a le isi vaega.
E pei ona sa lipotia muamua foi e le Samoa Times lea tulaga, ma sa oo ina fesoasoani mai ai se tasi o auauna Fesoasoani a le ekalesia o loo alaala i Aukilani ma toe faapupula atili ai tofiga a le ekalesia aoao, atoa ai ma lona faatulagaina mai lava i le tumutumu seia oo i tagata lotu.
Ua taoto nei i se taotoga saogalemu ma le filemu le mataupu, a o tau faamae‘a ai nisi o vaega mulimuli e saga faamautuina ai le leleiga ua uma ona totō. E lē taumateina le fiafia ma le viiga o le Atua ona o taimi faapea.
O le afio mai o le Alo e toatasi o le Atua, ma ua oo nei foi i le masina o tausaga taitasi e faamanatuina ai lona soifua mai. E tasi lava le mafuaaga ma le pogai o le faia lea o le Leleiga i le va o le Atua ma le tagata ina ua agasala i le amataga.
O sese ma faaletonu sa vavamamao ai le Atua ma lana tagata na fai, sa mafai e le Keriso manumalo ona toe tuufaatasia ma faalelei, ina ua talia e le tagata le Faaolataga ma ua tautino i le faamagaloga o sese ma agasala na afio mai ma Ia.
