“O Ianuari o le tausaga fou e amata aloaia ai”… Palemia
O Tesema 2011 i lona aso 29 ua fuafua le Malo e amata faataitai ai le suiga fou i aso, lea o le a tutusa ai aso i Samoa ma Niu Sila faapea ma Ausetalia. Peitai o Ianuari o le tausaga fou 2012 o le a amata aloaia ai loa.
Na saunoa le Palemia i tusitala a o faatali lana vaalele e malaga ese ai ma lana aumalaga i se fono a Malo Aufaatasi i le atunuu o Turkey ma ia faailoa ai lea fuafuaga a le Malo.
Na ia faailoa ai foi ua ioe le kapeneta e faatino loa le suiga o aso i le amata tapena o se tulafono e tuuina atu i le Palemene. Ina ua lata ina amata le suiga o itula o le aso le daylight saving i Samoa lea na amata ia Setema o le tausaga ua mavae, ae mae‘a ia Aperila o le tausaga nei, na amata laumanu‘ia ai tala feaveai i le sauni o le Malo e sui aso ia tutusa ma Niu Sila ma Ausetalia ma isi atunuu o loo latalata tele mai i Samoa e pei o Tonga ma Fiti.
E iai le talitonuga na mafua ona lē faia se faaiuga i le suiga o aso i le tausaga ua mavae, ona ua tapena le atunuu i lana faigapalota, ma sa faataatia e le faigamalo a le HRPP sa iai i lea taimi, se‘i faatali le faaiuga o le palota pe toe tulai mai.
O lea la ua faamaonia ni molimau e toe tulai mai le HRPP ona faatino lea o le suiga i aso.
Na saunoa le Palemia i tusitala, o le autū lava ua faia ai lea suiga ina ia faaleleia ai le itu i fefaatauaiga ma isi pisinisi i le va ma Ausetalia ma Niu Sila. Fai mai Tuilaepa o Samoa sa tutusa aso ma ia atunuu i tausaga e tele ua mavae, peitai o le tausaga e 1892 na talia ai e Malietoa Laupepa se fautuaga a ni tagata faipisinisi i Amerika ina ia faasee Samoa i le itu e Sasa‘e o le laina tuaoi o aso le dateline, ina ia aso faatasi ai ma Amerika ona o fefaatauaiga i lea vaitau.
O le taimi nei ua sili atu ona saoasaoa faiga faapisinisi i le va o Samoa ma Niu Sila ma Ausetalia ma isi atunuu Asia, ma o le mafuaaga lea o le suiga e pei ona faailoa e le Palemia.
O le tasi itu lelei pe a aso faatasi ma ia atunuu ona ua toatele tagata Samoa ua nonofo ma aumau i ia atunuu. I le itu i faalavelave fai o aiga na saunoa Tuilaepa, o se maliu e fai i Samoa poo Niu Sila e tau tapena pepa malaga ma sue se pasese ma fuafua i le aso i Niu Sila e teu ai le maliu, ma e amata muamua galuega i Niu Sila ae e lei amataina galuega i Samoa, o se itu e masani ona tuai ai feuiuiaiga o se malaga.
Afai nei e tutusa aso, o le a faigofie ona fai tonu ma o le a lē toe pei o le tulaga o iai nei. O le itu mautinoa pe a faatino le suiga o aso, o le a eseese ma isi motu o le atu Samoa o Tutuila ma Manu‘a lea ua avea ma teritori o le Iunaite Setete o Amerika. O le tausaga e 2009 na amata ai se isi suiga fou i Samoa o le suia o le itu auala e feoai ai taavale ma faaaogā taavale foeuli taumatau.
