Ua mae‘a le suesuega a le Faamasinoga Maualuga i Samoa i se tagi a se kamupani i Niu Sila faasaga i se alii Samoa ma sana uo tamaitai o se Samoa foi e faamautu i Niu Sila.
O mātua o lea alii Samoa sa tuuaia ina ua faaaogā se seleni na sese ona teu i le teugatupe a lea alii Samoa lana uo teine e faatau ai se fanua i Samoa.
E $129,195 tala tupe Niu Sila le tau atoa o se fefaatauaiga o oloa na faia e le kamupani Niu Sila o le RETAILQUIP NZ Limited mo le auina atu o oloa mo le kamupani o le Bunnings e faamautu i Manukau i Aukilani i Niu Sila.
O Novema o le tausaga e 2008 na faia ai lea fefaatauaiga lea e totogi ane ai e le kamupani o le Bunnings le tau o lana uta oloa i le RETAILQUIP e ala i le teu sa‘o o le seleni i le teugatupe a le kamupani i le faletupe o le Westpac i Aukilani.
Sa iai se sese i numera o le teugatupe ma mafua ai ona teu sese le $100,000 tupe Niu Sila ($161,000 tupe Samoa) i le teugatupe fai faatasi poo se joint account a Vaifale ma Leleiga i le faletupe o le Westpac i Aukilani.
O le lala lava lea o lea faletupe na teu foi i ai le seleni e le kamupani o le Bunnings lea na iai se sese i fuainumera o teugatupe ma tulai mai ai loa se faaletonu.
O le sasi na tupu na taumafai e toe faasa‘o ai le numera o le teugatupe a le kamupani o le RETAILQUIP e toe teu i ai le seleni, peitai e faatino lea tulaga ua uma ona toe teu pe transfer mai le seleni i le teugatupe a Leleiga o loo i le faletupe o le Westpac i Samoa. Na mulimuli ane e pei ona faaalia i faamaumauga a le faamasinoga i Mulinuu o lenei mataupu, malaga mai i Samoa Vaifale ma Leleiga.
O mātua o Vaifale o ni faifeau mo le ekalesia Katoliko (taofia suafa) ma o i laua ia na tuuaia e le kamupani i Niu Sila e ana le seleni na teu sese ona o se sasi i fuainumera o teugatupe poo accounts.
O le tagi a le kamupani na suesueina i le Faamasinoga Maualuga i Mulinuu sa finauina ai le toe fia maua atu o le seleni e selau afe tupe Niu Sila lea na teu mai i Samoa ma maua ai le aofaiga e tusa ma le $161,080 tala Samoa i lea taimi e pei ona faaalia i faamaumauga a le faamasinoga.
O le malaga mai i Samoa na faia ai loa le fuafuaga e faatau se fanua i Siusega e tusa ma le $200,000 tala i le faamoemoe e faamautu i ai matua o Vaifale ona ua lata ina malolo mai le galuega. Peitai o le mae‘a o nai masina talu ona mautu lea fuafuaga ae amata fesiligia loa i ni sailiiliga le auala na maua ai le $160,000. O sailiiliga ia na taunuu ai le mataupu i le faamasinoga.
Sa finauina e le loia a le itu tetee le lē talafeagai o mau a le itu tagi. Peitai ina ua mae‘a le iloiloga a le faamasinoga na faamaonia ai e lē tatau ona agavaa i laua na teu sese i ai le seleni i le la teugatupe fai faatasi.
Ua faia ai le faaiuga e toe maua lava e le TRADEQUIP le $160,000 tala Samoa, pe $100,000 tala Niu Sila. Ua faatonuina foi le itu tetee e totogi le $2,000 i le itu tagi faatasi ai ma le totogi o feoaiga ma nofoaga sa faamautu ai molimau uma a le itu tagi na malaga mai fafo mo le faamasinoga.
