“Ua manatu le matagaluega e toe taatia i se isi taimi”
E lei oo i le taimi e faia ai suega a le Tausaga Valu poo le Form 2 o le tausaga ua mavae atu nei, ae amata ona faalauiloa e le matagaluega o Aoga a le Malo, o le suega mulimuli faalauaitele lea mo le vasega Tausaga Valu, ona lē toe faia lea.
Peitai e lei mae‘a le tausaga na tea nei ae faaalia e se faiaoga sinia o se tasi o aoga tulagalua a se ekalesia i le taulaga i Apia e faapea, ua toe logo atu e le Matagaluega o Aoga, o le a toe faaauau le suega mo le Tausaga Valu i le tausaga nei.
O le vaiaso na tea nei sa taumafai atu ai i le fia maua o se faamatalaga mai le pulega o le Matagaluega o Aoga, Taaloga ma Aganuu i le mafuaaga ua toe suia ai le faaiuga ua mae‘a ona taoto.
E lei avanoa le Ofisa Sili ona sa auai i se fonotaga, ae o le faamatalaga ua maua, e sa‘o o le a toe faaauau.
“O le tulaga lena ua iai le mataupu ona ua manatu le matagaluega e pei ua vave le taimi ua faailoa ai le faaiuga ae e lei lava tapena i ai aoga tulagalua a ekalesia ma aoga tuma‘oti aemaise foi o mātua”. O le faamatalaga lea na maua mai se molimau ua lē manao e faailoa.
Ua faailoa mai foi e le molimau o loo tapena le matagaluega i se fonotaga faalauaitele poo se koneferenisi e faamalamalama atili le mataupu.
“O le aso 25 ma le 26 o le masina nei o loo fuafua e faia ai le fonotaga o le a tali uma ai fesili e uiga i le mataupu”.
O le suega faalauaitele poo le National Exam mo le Tausaga Valu, o se suega lea mo fanau o le a tuua le olaga faaleaoaoga i tulagalua, ae saili ni Kolisi e faaauau ai mo isi vasega i luga atu.
Na faaalia e se pule aoga o se tasi o aoga tulagalua a se ekalesia, na logo mai loa o le a lē toe faia le suega i le tausaga nei, feosofi ane loa le mau fesili ma popolega mai le tele o mātua.
O atugaluga o le toatele e autū i le ola a‘oa‘oina o le fanau, pe faapefea ona saili se isi aoga pe a mae‘a le tulagalua.
Pe o lona uiga o le a mae‘a loa le Tausaga Valu, filifili lava e le aoga tulagalua le Kolisi e ave i ai fanau pe o le a saili e mātua ni aoga.
“O le tulaga faigata i aoga a le matou ekalesia, ona e iai a matou kolisi maualuluga, ma o suega ia e iloa ai togi maualuluga e maua e tamaiti ona fuafua lea e matou tamaiti lelei e ave ia matou kolisi”.
Na faaalia foi e le molimau lea, afai o le a lē toe faia suega mo le Tausaga Valu, o le a lē toe tinou faiaoga o loo galulue i aoga tulagalua a le Malo e a‘oa‘o fanau, auā na o le fia uma lava o le tausaga mulimuli o le tamaititi ma le teineititi ona tusi lea o le lisi o aoga e alu i ai lea tamaititi ma lea teineititi.
“O le itu sili la ona faigata o mātua o le a lē maua se aoga a lona atalii ma lona afafine, o ai la e pau i ai le tulaga lena?”
O le itu mautinoa e pei ona silafia e lē o tamaiti uma o se vasega tausaga valu, e maua ni aoga e o i ai pe a mae‘a le valu tausaga i le aoga tulagalua.
O fanau e lē ausia togi e maua ai se aoga, e saili e nai mātua se aoga e faaauau ai, ma o se faiga ua leva tausaga o faatino pea i Samoa.
