O le vasega o Leoleo o le a masii atu i le isi faigamalaga mo tiute faa leoleo i Sudan, o le a malaga ai mo le uluai taimi tamaitai.
O lenei faigamalaga ua tofia ai alii leoleo e toafā ma tamaitai leoleo e toafā.
Sa talosaga i latou uma nei ina ua faasalalau avanoa ua tuuina mai e Malo Aufaatasi e galulue ai o leoleo o Malo Aufaatasi i auaunaga ua faia i lea itu o Aferika.
O le faamatalaga a le sui sooupu o le Matagaluega o Leoleo ma Falepuipui, le Afioga Leaupepe Fatu Pula, o le auaunaga lenei ua faia e faatumau ai le filemu i lea itu o Aferika, ma o le taimi lenei ua faasolosolo filemu lava lea atunuu ae o loo moomia pea le lagolagosua a leoleo ma fitafita mai i le Faalapotopotoga lenei o le Lalolagi ina ia mautu ai lea filemu.
Ua silia i le lima tausaga o malaga leoleo o Samoa i galuega faatino i lea atunuu. Na amata lava a o sauni ai Sudan i lana uluai taumafaiga mo faigapalota e saili ai sona taitai e pei ona sa iai vevesi na tulai mai i lea atunuu.
Ua tele suiga mo se filemu ae ua faaauau pea galuega a leoleo i lea atunuu.
Sa fesiligia le Matagaluega i le tausaga na tea nei i le mafuaaga e lē malaga ai ni tamaitai i galuega i lea atunuu, ae o le faamatalaga na tuuina mai o avanoa lava o loo tuuina mai e Malo Aufaatasi i tausaga ua mavae e agai sa‘o lava i alii, peitai o lea ua foliga mai ua tatala le avanoa mo tamaitai leoleo mo ia galuega o le tausiga o le filemu.
O Timor i Sasa‘e lea na ave ai i le tausaga na tea nei leoleo mai i Samoa i lana auaunaga i lea foi atunuu. O se tasi foi lea o galuega ua faatino e Malo Aufaatasi ma ua aofia ai foi Samoa i leoleo ma fitafita ua faaaogāina mo galuega i lea atunuu.
O le aumalaga mulimuli la lea a Samoa o loo galulue ai nei ni tamaitai, ma e na o tamaitai lava na agai atu i lea atunuu i le vasega o leoleo mai i Samoa.
E na o le toatasi le tamaitai leoleo ua foi mai i le aumalaga lea ona o le gasegase o lona alii na iu ina maliu ai lava i Samoa, ma ua toe foi lea tamaitai i galuega faaleoleo i totonu o le Ofisa o Leoleo i Apia. O le isi vaega uma o lea vasega o tamaitai leoleo o loo faaauau a latou tiute i Timor i Sasa‘e.
O le isi atunuu e faatino ai auaunaga a leoleo mai i Samoa o le Atu Solomona i lalo o le polokalame fesoasoani a atunuu o le Pasefika mo le tausiga lava o le filemu.
O le polokalame lea ua ta‘ua o le RAMSI ua taitaia e Niu Sila ma Ausetalia ae ua aofia ai leoleo ma fitafita o atumotu o le FORUM poo le fono a le Pasefika.
O alii ma tamaitai leoleo mai i Samoa ua maua ai avanoa mo ia tiute faaleoleo i fafo. O Sudan la lea ua sauni atu ai le toavalu o leoleo ua filifilia e aofia ai ma tamaitai i lea aumalaga.
