“E le suia lava le mau tauave a le Pacific Ezy”
Ua iai suiga o tulafono a Niu Sila i le lafoina o tupe i soo se atunuu e aofia ai ma Samoa, lea ua usitaia e le kamupani lafo tupe faamomoli o le Pacific Ezy Money Transfer, lea ua lesitala ai tagata i Niu Sila ma tuuina i ai se card e faamauina faamatalaga e faasino ia i latou e pei o nofoaga o loo faamautu ai.
O se tulafono e puipuia ai faiga solitulafono i tupe eleelea ma faiga terorisi. O i latou la ua maea ona lesitala i le Pacific Ezy ma maua a latou ID card poo pepa e iloagofie ai, ua faaaoga ai e lafo mai ai a latou seleni i o latou aiga ma uo ma i Samoa.
Ona o pepa faamaonia ua latou tauaaoina, o lea ua faamanuiaina ai ma tagata o o latou aiga i Samoa i le se‘i o le masina o Aukuso 2013 a lea kamupani lafo tupe faamomoli. Faaalia e le alii pule sili le afioga Muliagatele Faimalo Allan Stowers, e ui lava ina faamalosia suiga o tulafono a Niu Sila, ae e le tuua ai faalauiloa a lana kamupani ona o le naunau ia toe faafoi atu se vaega o ana tupe maua i o tatou lava tagata, aemaise o aiga o le mamalu o le atunuu i Niu Sila o loo lafo mai ai seleni.
O loo sauni foi le kamupani mo sana faalauiloa i le masina fou o Oketopa aua le vaitaimi e pisi ai le lafoina mai o tupe mai fafo mo aiga i Samoa ona o faatauga o le Aso Sa paepae o le fanau poo le lotu a tamaiti aemaise o seleni mo ipu o e pele ua maliliu lea e masani ona lafo i le Aso Sa tonu o tamaiti.
O i latou e toa 20 ua faamanuiaina ua maua failogatupe tai selau tala, peitai ona o le vaai alofa o le pulega o le Pacific Ezy Money Transfer i le malaga mamao mai o nisi na maua faailogatupe mai Savaii ma nuu e mamao ma le taulaga, na faapea ona faaopoopo ai le lima sefulu tala mo i latou mai Savaii, lua sefulu tala mo pasese oi latou e malaga mai nuu i tua i Upolu ae sefulu tala mo i latou e alala tau lalata i le taulaga o Apia.
Faaalia e le pulega o le kamupani na faaalu ai le isi lima selau tala ae ese le lua afe na faaalu mo faailoga tai selau tala mo i latou e toa luasefulu. Silasila i le lisi o i latou na maua faailoga tupe faapea suafa o i latou i Niu Sila na lafoina seleni i Samoa.
O le itu agavale o suafa o i latou i Niu Sila ae o le itu taumatau o i latou i Samoa ua maua faailoga tupe, lea na tufa foi i ai ma pulou ma ato a le Pacific Ezy.
