Faatali pea galuega a le Komisi suesue

O loo faatali pea le atunuu i se taimi o le a faalauiloa mai ai sui o le Komisi suesue o le a suesueina faaletonu i le falepuipui i Tafaigata e pei ona iai ni tuuaiga malolosi o loo faaalia i se tusi na ave i le Palemia e se tamaitai sa galue o se leoleo o le falepuipui na faamuta lana galuega ona o se faaiuga a le Komesina o leoleo lea o loo faamalolo lē tumau ae sei faia le suesuega.
O sailiiliga i le fia iloa poo ai tonu nisi o le a avea ma sui o lea komisi suesue, ae poo afea foi e amata ai, ae pe faataga tusitala ona auai e faafofoga i molimau, ua maua ai ni faamatalaga mai ni molimau.
Ua faailoa e ia molimau e lei faamaonia, sa tofia sui o le komisi suesue sa aofia ai se tamaitai ma se tamalii ua litaea mai le galuega faaleoleo. Peitai na toe faia se isi faaiuga a le kapeneta e aveese ia sui e toalua ona o nisi o faaeteetega i le iai o lo la sootaga i le galuega faaleoleo aemaise o le tamalii sa avea ma pule o le falepuipui a o galue ai i le matagaluega i tausaga ua mavae.
O nai sailiiliga sa faia na fesiligia ai le Loia sili a le Malo, ae sa ia faailoa mai o le a iai se taimi ona faalauiloa mai lea e le taitaifono o le komisi suesue poo a tonu tiute o le komisi ma vaega o le a tulai i ai a latou sailiiliga.
O le a faailoa mai ai foi ma le tulaga i le tatala o le avanoa i aufaasalalau ma tusitala e faafofoga ai i molimau ma faia ni a latou lipoti ae pe faataga foi le atunuu ona faafofoga i taualumaga o ia suesuega.
O le tala mai a se tamaitai e galue i le ofisa o le Komesina o sulufaiga, o loo iai tusi ua ave i nisi e faasino i le suesuega ae o loo faatali ni tali atu.
“O lea e faatali ni tali mai o tusi na ave”. O le faamatalaga foi lea mai le sui Komesina o le matagaluega o leoleo le susuga Fauono Talalelei Tapu, ina ua fesiligia poo ai nisi o le matagaluega o le a tutulai i luma o le komisi mo ni a latou molimau tuufofoga.
E ui o loo faatalitali pea i se taimi e faailoa mai ai e le taitaifono o le komisi suesue vaega o loo fia silafia e le atunuu, ae ua faaalia e se molimau o le suesuega o le a faia o se isi lea tulaga taua i le faaiuga a le Malo, ina ia mafai ai ona iloa tonu ni faaletonu o aafia ai le pulea ma le faagaioia o le falepuipui i Tafaigata. Ua tele tausaga o aliali mai tuuaiga o pulega le lelei i le nofoaga ae sa le faia lava i ai se sailiiliga.
O se tasi o molimau o se tasi e iai sona silafia atoatoa i le pulea o le falepuipui na ia faailoa ai, o le faia o le komisi suesue ona o le suesuega na faia e le vaega o le professional standards a leoleo i tuuaiga o loo taua i le tusi a le tamaitai o Adeline, lea sa faamalolo mai le toe avea ma leoleo o le falepuipui, e lei maea ona e faapea na iai se faaiuga a le pulega o le matagaluega e faamuta.