O se tasi o Polokalame iloga i totonu o leitio Samoa i Sini, le ‘Siuleo ole Samoa-na-Galo’ ua suia nei i le taimi fou o le itula e lima agai i le fitu i le afiafi o Aso Sa taitasi. O loo tumau pea le nila o lau laau faalogologo i le FM 90.5 ae ua lē toe iai i Aso Toonai mai le lua i le aoauli agai i le lima i afiafi o Aso Toonai.
O se taimi fou ma o se leitio Samoa muamua lenei ua faia lana tautua i le afiafi o Aso Sa i lenei taimi aupito moomia e le au faafogafoga i lea taimi e tuua ai sauniga lotu ma mae‘a toonai i Aso Sa taitasi.
Na faafofoga foi le mamalu o le atunuu i le agaga faafetai o le Pule Faatonu o le ‘Samoa na Galo’ Afioga Tagaloa Seiuli Faleao Paulo Autagavaia Vaai i le uluai faasalalauga i le Aso Sa. Na momoli foi le faafetai tele a le afioga ia Tagaloa Seiuli i le paia ma le mamalu o le atunuu mo le talisapaia o le tautua a le FM90.5 mai le tele o tausaga ua tea.
O le faletua ia Elaine o le soatau lea o le polokalame ma o se siufofoga iloga foi i le taimi o le ‘faamalositino’ poo le polokalame e fai mai ai le Zumba ma isi koleniga i luga o le leitio e faafetaui ma le pese vave ae tolaulau mai e Elaine ma le Afioga Tagaloa suafa o i latou o faalogologo atu ma isi ana uo ma paaga o loo moomia lava le faamalositino. E lē gata i lea o itulau o Samoa ma lona talafaasolopito faapea le lalolagi.
O lenei lava foi polokalame o loo fai paaga ma le Samoa Times mai Niu Sila
e fogafogaina ai itulau eseese mai lomiga o lea nusipepa iloga. O se tasi lenei polokalame ua loa foi ona tautua i le faalauiloaina o tama fanau a Samoa na masii mai i Ausetalia nei mo faafiafiaga e pei o Ben Petana, Joe Failua faapea Mailo Ben Vai aemaise Vaniah Toloa.
E manatua ai foi se tasi o tamalii ua faiilagi lana folauga sa avea ma soatau o le Afioga ia Tagaloa Seiuli lea na amia e lona matai o avea pea ma sui o lenei alaleo mai Samoa le Tofa Tiufea Tino Vaa lea o loo faaauau nei e lona tuafafine ia Ana Maria Tiufea lo la sao i le ‘Siuleo ole Samoa-na-Galo.’
