O le lona iva (9) ai lea o lomiga o le Tusi Telefoni a le Talamua o lenei tausaga 2015.
Na faatauaia se sauniga i le Ofisa o le Talamua i lona Ofisa i le Nia Mall, i le Aso Gafua 16 Fepuari, e faalauiloa ai le taunuuga o le galuega na feagai ai ma le Ofisa.
Na auai nisi o le aufaipisinisi, aemaise i latou o loo fai paaga ma le Talamua e molimauina le faamoemoe o lea aso.
O le Tusi e pei ona lomia, o loo iai faamaumauga uma o pisinisi, o faalapotopotoga, o kamupani aemaise o Matagaluega a le Malo.
E lē gata i lea, ae o loo iai foi faamaumauga o pisinisi, kamupani, faalapotopotoga i totonu o Amerika Samoa, auā le faaaogāina e tagata e fesootai ai i soo se taimi e moomia ai.
I le saunoaga autu na sauni i ai le Peresitene o le SAME, Afioga Tagaloa Eddie Wilson, ma sa faatāuaina i lana saunoaga le tāua o le iai o faamaumauga auā le nofo silafia e le mamalu o le atunuu, o faamaumauga e mafai ona faaaogā mo fesootaiga i soo se taimi.
E pei ona saunoa Tagaloa i le faamoemoe o loo alo atu i ai le SAME, auā le faatauga oloa a Samoa e faia i Ausetalia i le masina o Mati, o le faamoemoe ina ia faalauiloa nisi o oloa aemaise o le auina atu lea o le aufaipisinisi auā le faalauiloaina o a latou oloa i totonu o Ausetalia.
O le ala lea o le tāua o oloa e gaosia lava e o tatou lava lima e pei ona saunoa Tagaloa, e mafai ona aga atu i faaalia oloa e faatautaia, ona faaalia lava lea o a tatou oloa e gaosia mai lava i laufanua o Samoa.
Na momoli le faamalo a le Afioga i le Peresitene, i le Pulega ma le aufaigaluega a le Talamua, ona o lea ua taulau o le faamoemoe e pei ona atofaina, mo le faalauiloa o lea Tusi Telefoni fou mo fesootaiga i totonu o le atunuu.
Peitai i se faatalatalanoaga ma le Afioga ia Faumuina Apulu Lance Polu, o le Faatonu o le Talamua, na ia faamauina ai le agaga faafetai i paaga uma a le Talamua, na mafai ona tuuina atu faamatalaga ma faamaumauga auā le faaaogāina e le Talamua mo le faamoemoe.
O le tāua o lea faamoemoe e pei ona saunoa Faumuina, ona o se tasi lea o vaega e moomia e le toatele o le mamalu o le atunuu.
O faamaumauga o numera o telefoni, o nofoaga o soo se kamupani, pisinisi, faalapotopotoga aemaise i Matagaluega a le Malo, o vaega ia e moomia ai e le mamalu o le atunuu le silafia i nofoaga o loo iai.
A silasila i le Tusi e pei ona lomia, o loo lisiina mai ai soo se pisinisi, o numera o telefoni, aemaise o nofoaga o loo iai.
O le toe lomia ai e le Talamua o lea lomiga fou, ona na saunoa Faumuina e faapea, o le tele o nisi o Kamupani, Pisinisi, Faalapotopotoga ma Matagaluega, ua sui a latou numera o telefoni, sui foi ma nofoaga o loo iai.
Na saunoa Faumuina, o le auaunaga lava lea a le Talamua, ina ia faailoa atu i le mamalu o le atunuu soo se faamatalaga aemaise lava e fesoasoani i aiga e lē gata o totonu lava o Samoa ae faapea foi ma Amerika Samoa.
“O lea ua tino mai le faamoemoe, ma ua avanoa foi le Ofisa o le Talamua mo le mamalu o le atunuu e talaaao mai mo le faatauina o se Tusi Telefoni, auā le tulaga mo fesootaiga.”
O le Susuga ia Patele Fereti na avea ma Taitai o le sauniga, auā le faamoemoe o le aso, ma sa ia faatāuaina ai le soifua atiae o tagata o Samoa.
O le faaaogāina o lea Tusi Telefoni fou e pei ona faalauiloa, e faaaogāina ai vaega i luga o le initaneti e faafaigofie ai ona saili e vaega o loo e moomia.
Ua mafai nei ona faatau le tusi telefoni fou mai le Ofisa o le Talamua i le fogafalelua o le NIA MALL i Fugalei, e faafesagai ma le Maketi fou.
