O loo faagasolo galuega i le taimi lenei a le Kamupani gaosi faguinu ma le ava malosi, le Vailima i suiga o le a tulai mai i le faatau ai e le kamupani tele o le Coca Cola i Ausetalia o sea uma a le Fosters lea na pulea le kamupani i Samoa nei.
O le tausaga na tea nei lea sa faamautu ai le faatauga e se isi kamupani o le ava malosi o le SAB Miller le kamupani a le Fosters ma faatau atu ai loa lala o le Fosters e aofia ai le Vailima i Samoa ma le lala o le Fosters i Fiti i le kamupani lea a le Coca Cola i Ausetalia, lea la ua iai nei le suiga.
O le Vailima o loo gaosi e pei lava o le pia a Siamani o le Larger ma o se tasi o pia ua tele ona faailoga faavaomalo. O se tasi o lenei o kamupani muamua a le Malo na faapea ona faatau atu i fafo ma o le tausaga e 1999 lea na faatau atu ai i le kamupani o le Fosters ae o lea la ua faapea ona toe faatau atu i le kamupani o le Coca Cola i Ausetalia.
E lē o iai se faamatalaga aloaia ua aumai i le ofisa o le Vailima i Vaitele e faatatau i lenei suiga ae e lē o iai ni suiga tetele ua vaaia i le taimi lenei i le faatinoga o le auaunaga lenei.
O le Samoa Breweries poo le Vailima o loo utufagu ai foi le Coca Cola ma isi ituaiga faguinu i lalo o le laisene lava lea a le Coca Cola, ma o lana auaunaga ua aofia ai le gaosi o le tusa ma le 8 ma le afa miliona o lita o le pia atoa ai le gaosia o le ono ma le ‘afa miliona lita o faguinu i le tausaga e tasi.
O le tele lava o le pia o loo gaosi i le atunuu o loo faaaogā lava i Samoa ae o le 12 pasene o lenei oloa gaosi i le tausaga e alu i fafo e pei ona faatau atu i Amerika Samoa, Niu Sila atoa ai le Atu Kuki.
O le nofoaga tutotonu o le Vailima i Vaitele ua faamautu ai lona ofisa aemaise o le nofoaga o loo gaosi ai le ava lenei ma utu ai faguinu o loo ua maua ma faatau i Samoa nei.
Ua lē gata la i tagata faigaluega ua maua ai avanoa e galulue ai i lea nofoaga ae ua tele foi kamupani i totonu lava o Upolu ma Savaii ua maua ai galuega i lea kamupani tele, e ala lea i le faamautu i ai o le aoina ma le faatau ai o atigifagu aemaise o lala nei o loo faapea ona faamautu ai le faatau atu i vaega eseese o le atunuu o le fagu pia atoa ai ma le faguinu suamalie.
