Na faamatala e le alii leoleo o Lio Kaihau se tala mo‘i lava o se mea na tupu i le isi aso, a o ia galue i lana galuega o le leoleo. “I se tasi o aso i la‘u galuega, na feau mai ai a‘u ou te fesoasoani i se fafine sa tau pule i lona ola.
“Sa ou momoli atu o ia i le falemai mo togafitiga. Sa faigata ona ou fesoasoani i lea tina, ona sa tele sona aafiaga. Sa ta‘ua e le tina, o loo ia vaaia le temoni o totolo i le pito o le potu, ma talanoa atu ia te ia. Peitai, na ou taumafai e fesilisili pea i le tina, ma faatalanoa ma fesoasoani i ai”.
“I le taimi o lea talanoaga, sa ou mafaufau lava i se auala e mafai ona fesoasoani ai i lea tina, ma ou faapea ai, e tasi lava le auala o lo‘u tatalo mo le tina, auā o a‘u o le tagata faatuatua Kerisiano”.
“Sa ou tatalo loa mo ia, ma ou vaaia le suiga i le tina, sa ou valaaulia le tina i la‘u lotu, ma sa ia talia ai Iesu e avea ma lona faaola, ma o le taimi nei ua suia le olaga o lea tina, ua maloloina i le mana o le tatalo ma le faatuatua”.
“O le mafuaaga lea na ou manao ai ia avea a‘u ma leoleo, ona ou te manao ia ou fesoasoani i soo se tagata, i soo se auala”.
O le tautinoga lea a le alii leoleo o Lio, i lana saunoaga i se polokame fou a leoleo na tatalaina i le Aso Tofi o le vaiaso na tea nei i Otara.
O lea polokalame o loo faagasolo nei e le matagaluega a leoleo, ua faaigoaina o le NEWCOPS, o loo faaautu lea mo le taumafai ia maua ma tosina ni alii ma tamaitai Pasefika e faaulu atu i le kolisi mo le aoaoina ia avea ma leoleo a le malo Niu Sila.
O le faaaogāina o se ata na tusia e lagolago ai lea polokalame a leoleo, sa tatalaina i le taulaga faatau i Otara, i le itu o le taulaga o loo faia ai le flea maketi i taeao o Aso Toonai taitasi.
O lea ata tusi, e faatatau tonu lea i le tautinoga poo le tala a le alii leoleo o Lio, i le fafine na ulufia e temoni, lea na ia tatalo ai.
O nisi nei o auala, o loo faatāuaina e le Matagaluega a Leoleo i Niu Sila, ia avea tala a leoleo, ma latou tautinoga ia latou galuega, e faatosina ai le tupulaga talavou, o i latou e lelei le talanoa ma tagata, ma iai le loto fia fesoasoani moni i tagata, ma faaaogāina a latou tomai, ma metotia eseese, e pei o Lio, i lona faaaogāina o lona faatuatuaga faa-Kerisiano.
I se pepa o faamatalaga a le Matagaluega a leoleo, o loo tusia ai le faamoemoe a le matagaluega, e 160-240 le fuainumera o alii ma tamaitai leoleo fou o le a latou sailia mo le faaulu atu mai le masina o Iulai 2012 e oo ia Iuni 2013.
I le saunoaga a le sui Komisina a leoleo, o Viv Richard, o loo ia faailoa mai, o loo saili ni apalai mo leoleo, aemaise mai le tupulaga Maori, Pasefika, Initia, Aferika, ma Asia.
Ona o latou e sili atu ona mafai ona latou fesoasoani i tagata eseese, auā e faaaogāina o latou aganuu, siosiomaga, ma talitonuga, e atili faalelei ai le auauna mo soo se tagata lautele.
Mo nisi faamatalaga faafesootai pe apalai i le upega o fesootaiga a leoleo. www.newcops.co.nz/extraordinary
