Na matuā faatumulia le faletalimalo o le The Chateau On The Park i Kalaisetete i le aso 9 – 11 o Me, 2014, i le sueina lea o se sui tauva o Niu Sila mo le tauvaga a le lalolagi e faia i Kuala Lumpur i le tausaga nei i le masina o Aukuso, i le faalapotopotoga lenei a le Toastmasters.
O lea la ua mae‘a nei tauvaga faaiu, e toaiva sui tauva mai Niu Sila atoa na tauva ai ma le naunautaiga ina ia mauaina se manumalo.
O le faaiuga la ua toe manumalo foi le alii lenei o Kingi Biddle mai Hawkes Bay i le tulaga muamua. Tulaga lua le alo o Samoa le alii o Ami Pepe, ae tulaga tolu le alii o Justin Thompson mai North Shore.
O le faatolu ai lea na manumalo Kingi Biddle ia Niu Sila, ma o le faatolu foi lea ona avea o ia e fai ma sui o Niu Sila e tauva i le lalolagi. O le tausaga na tea nei na faamanuiaina ai Kingi Biddle i le tulaga lua i le lalolagi atoa sa faia lea i Amerika. Ae o lea foi ua toe taumafai atu o ia mo lenei tausaga ma lona naunautaiga e fia maua lava e ia le tulaga muamua.
O le tausaga na tea nei 2013, i totonu o tauvaga faaiu a Niu Sila, na faamanuiaina ai le alo o le tatou atunuu o Ami Pepe i le tulaga tolu. Ae o le tausaga nei, lea ua faamanuiaina o ia i le tulaga lua. Lona uiga, o lea ua maitau atu, o loo faasolosolo pea i luma le tulaga o Ami Pepe i totonu o Niu Sila ma nei tauvaga lauga.
O se naunautaiga la ua faaalia mai e Ami Pepe e faapea, o le a ia toe taumafai atu foi mo le tausaga fou. O loo iai pea lona talitonuga, e tatau lava ma onomea le iai o se alo o Samoa e tauva i nei tauvaga lauga a le lalolagi o le a faia i Las Vegas i Amerika i le tausaga fou. Ma fia faaailoa atu ai i le lalolagi atoa, o Samoa o tagata e lelei tele i le matafaioi lenei o le lauga.
E fia faaailoa atu foi i nisi o tamalii ma failauga o le tatou atunuu e faapea, ua iai nei le naunautaiga o Ami Pepe ma nisi o alo o Samoa o loo i totonu o lenei faalapotopotoga, o le a faatūina se Toastmasters i totonu o Aukilani i Saute.
E lē gata o le a faaleleia atili ai le tautala i luma o tagata, ae faapea foi le faalelei atili o le fesootaiga faalauaitele mo le ola soifua alualu i luma o le tagata i totonu o galuega, ekalesia, faalapotopotoga, asosi ma totonu foi o aiga. O le a tele se siitiaga o oe ma lou ola fia taumafai, pe a e auai mai i nei aoaoga lelei ma le tāua tele. O loo fuafuaina lenei faamoemoe e tatau ona amataina i le masina o Iulai i le tausaga nei lava 2014. Mo nisi o faamatalaga e mafai ona fesootai mai Ami Pepe i le 021 809 968, poo le ami@pepespeaker.com, poo le www.pepespeaker.com.
