E pei o se faama‘i e tetele tetele mai, toe mou atu ae na o se vaitaimi lava e mou mālie atu ai ae toe alia‘e mai foi.
O le faama‘i lea ua toe vaaia le aliali mai i Samoa, o le umia o laau malosi.
O lea faato‘ā savali nei le lua vaiaso talu ai se faalavelave na maliu ai se alii talavou ina ua ia osofaia lona toalua i se laau malosi, le ituaiga o le pistol poo fana laiti o loo vaaia i ata tifaga le faaaogāina ai.
O Pesega i le faleoloa o R&J McKenzies lea na tulai mai ai lea faalavelave, ma na uma ona osofai e lea alii lona toalua ua matapogia le fafine, ae toe faliu ane faaoo le oti ia te ia lava.
O se faalavelave e oo mai i le asō e lē o lotea lava pe faalauiloa e le Ofisa o Leoleo le mafuaaga, peitai, ua masalomia lava se feeseeseaiga faaleulugalii na tulai mai ai le faalavelave.
Ua sao mai la le tamaitai ona o lona aao (vae) na lavea ae o lona toalua ua maliu ai lava. Sa faamaonia mai e le Sui Sooupu o le Ofisa o Leoleo ma Falepuipui, o ia foi lea o le tasi o Komesina Lagolago a le Matagaluega, o Leaupepe Fatu Pula, o le fana na faaaogā i lenei osofaiga matautia e lē faatagaina i totonu o Samoa.
“O le ituaiga lea o le pistol, e lē o faatagaina faaletulafono”.
E ui i lea faaaliga, ae o lea lava o loo vaaia le tulai mai o faalavelave o loo maua mai ai lava nei ituaiga a‘upega faasā.
O le sao mai i totonu o Samoa o nei ituaiga laau malosi o lea lava e manumi ai muaulu o le toatele auā o lea lava e sao mai i le atunuu.
O le faaiuga foi o le vaiaso na tulai mai ai se isi faalavelave i Alafua, ae na faafetaia le leai o se tasi na maliu ai, ae o le tamā o le aiga na taufana ma lana fanau tama.
O le po lava lea na oo atu ai Leoleo i le fale o lea aiga ma taofia ai le tamā ma ona atalii e toalua ona o lea mataupu.
E lē gata i lea na tulai mai ai foi se isi vevesi i le po lava lea i Lotopa i le Malae Taaalo a le Malisi. Na matuā faateia ai sui o le Kalapu a Malisi a o faauma i le Kalapu taaloga ma tausinioga o le Aso Toonai, ae masau atu se taavale e o atu ai ni alii talavou i tua ma se sui lava o le Kalapu ae ua leva e lei toe alu ane i le Asosi, o loo ia umia se laau malosi.
E lei faapāpā la lea fana, peitai na ta‘ua e sui o le Kalapu a Malisi, na faalālā solo a o valaau atu upu tau faamata‘u e lea alii.
Ua oo faitioga a nisi sa iai i lea lotoā i lea afiafi i le Ofisa o leoleo ma ua oo foi se sāvali a le Asosi a le Malisi i le afioaga o Lepea lea ua ta‘ua e lipoti na o atu ai i latou nei na taumafai e faatupu se vevesi i lea nofoaga.
O le faamatalaga a sui o le Laulauafono a le Malisi, e lagona lava le faanoanoa ina ua manino mulimuli ane, o nei alii e toafā na oo atu lava e faatupu le pisa, peitai o le taumafai lava e faafilemu le mataupu na lē tulai mai ai se faalavelave e telē atu.
O le sāvali ua ave ia Lepea, e lē toe faatagaina lava se sui o le Kalapu Lakapi a Lepea i totonu o le Lotoā a le Malisi, ma o le alii na faalālā atu le fana ua tapu foi mai totonu o le Lotoā lenei.
Ua iai foi le fuafuaga a le Malisi e ave le mataupu lenei i le Ofisa o leoleo auā e tulai mai foi lea vevesi, o loo iai sui o le Asosi o Taaloga a Teine Tuai o le Sagata Maria, ma o tamaitai sa iai i lea po na faliu ane foi i ai le alii lenei na taitaia atu le ‘au faatupu vevesi, ma valaau atu upu tau faamata‘u ma upu masoā i tamaitai a o fai ai se latou potopotoga i le Malae tenisi o loo i totonu lava o le Lotoā a le Malisi i Lotopa.
Ua faaalia e le Malisi ua mae‘a ona oo atu se faatoesega a le alii ua tuuaia i le umia o le laau malosi ma e lei toe minoi foi la le Malisi e faia se isi laasaga, e pei o se tagi i Leoleo, ae ua oo lava i le nuu ona o le taumafai e tāpā se fesoasoani a Alii ma Faipule o le afioaga i le taofia ma le lapataia ai o nei alii na faia lea tulaga i le faaiuga o le vaiaso.
O le tala a le Pulenuu o Lepea, o Aii Vavao, e faatali seia toe fono le nuu ona talanoaina loa lea o lenei mataupu.
O laau malosi, ua faalua nei ona faatino se galuega a le Ofisa o Leoleo ma Falepuipui ina ia aveesea ai laau malosi e faasāina ma laau malosi e lei toe lesitalaina pe maua foi ni laisene i totonu o Samoa.
O le matafaioi lava lea ua tuu atu i le mamalu lautele o le atunuu ona e lē mafai i le tulafono ona faamalosia e leoleo ni sailiga i fale uma o le atunuu mo ia a‘upega.
E faalua ona faia le talosaga a le Matagaluega o Leoleo ma Falepuipui i totonu o le lima tausaga ua mae‘a atu, ma e matuā tele lava le fana na maua mai ai peitai o lea lava e manino o loo iai lava le tele o nei a‘upega lē faatagaina o loo salalau solo i itu e fia o Samoa, ma seiloga lava ua tulai mai ni masalosaloga i nisi e umia ia laau malosi, pe tulai mai ai foi ni faalavelave, ona faato‘ā mafai loa lea e Leoleo ona agai e saili ma taumafai e ao mai ia laau malosi.
O le talosaga faifai pea a le Matagaluega e mo soo se tasi e vaaia ni tagata o loo umia ni laau malosi pe o iai i o latou fale ia a‘upega ina ia lipoti vave ane leoloeo.
Ua taofia uma e leoleo laau malosi ia na aafia i faalavelave uma nei ma ua tālia foi taimi e tulai ai ē ua molia i le umia o nei a‘upega i luma o le Faamasinoga.
