E lē o faigofie tapenaga a le Tautua Samoa i le palota tele o le 2011. Ua talitonu lea vaega faaupufai ua galulue faatasi nei ma isi pati faaupufai laity, e faigofie i sui faatutu o loo tauva mo le HRPP ona faailoa vave i latou, ae faigata i sui faatutu o le latou pati o loo galulue mo le Malo ona faailoa, ona e fefefe ina ne‘i vave iloa ona motu ai lea o le pa‘u falaoa. O se isi faaupuga o le lē toe maua o le galuega pe a alu alu i le palota ae te‘i ua lē manuia.
Ua fai ma pine faamau o lea lagona ma talitonuga o le Tautua Samoa, se tasi o o latou sui sa lagolago malosi i le latou vaega faaupufai i lona amataga mai. Peitai ua usitai lea sui i le finagalo o alii ma faipule e alu e tauva mo le HRPP.
O le mafuaaga foi lea o le vave faailoa e le tasi o faipule matua ma sinia o le Tautua Samoa, le afioga Palusalue Faapo le II o le isi o sui faatu o le latou pati, le afioga Tauiliili Fao Harry Schuster, lea o loo avea ma faamasino o le Faamasinoga Faaitumalo.
Ua faailoa e le sui sooupu o le vaega faaupufai, le tofa Lealailepule Rimoni Aiafi, e ui ina faailoa mai sui tauva o le HRPP o loo vaai alofa le komiti o le latou tapenaga i nisi o sui o loo umia tofiga maualuluga ma sinia i le Malo ina ne‘i aafia a latou galuega.
Ua manatu ai e faato‘ā faailoa suafa o a latou sui tauva pe a tapunia le lola o tagata lesitala mo le palota i le masina fou o Novema.
U faaalia foi e Lealailepule Rimoni, o se faiga e lē faatemokarasi le faiaina o tagata faigaluega a le Malo e tauva mo le itu agai ae lē toe maua ai fua a latou galuega, ae tau o sui tauva o le HRPP e toe selesele i galuega pe a lē faamanuiaina.
Ua silia i le 40 sui tauva o le Tautua Samoa ae ua valoia le oo atu i le fitu sefulu pe a mae‘a ona faamautu lelei le lisi o suafa o sui tauva.
O le HRPP ua faailoa mai e se molimau faatuatuaina, ua oo atu i le lima sefulu sui faatutu fou ua lesitala ma faamauina o latou suafa. Peitai e lē o faitauina ai ma le 30 ma ona tupu o nofoa o loo umia nei e le HRPP i le Palemene o loo iai nei.
A tuu faatasi sui fou ma sui tuai faapea ma nisi sui e toe faaopoopo atu pe a tapunia le lesitala i le masina nei lea e fuafua e faalauiloa sui faatutū o le HRPP i le Aso Tofi 14 o Oketopa 2010, e ono oo atu i le to‘a selau sui tauva a lea pati faaupufai.
