Talimalo 2011 – Iunivesite Waikato
SOOTAGA. O le igoa ua filifilia e le asosi o alo ma fanau a Samoa o loo aotauina i iunivesite eseese i Niu Sila, e faaigoa ai le latou tuufaatasiga faaletausaga.
O le auga o lenei Sootaga, o se avanoa lelei e toe fesootai ma feiloai ai fanau aoga, ina ia fefaasoaai o latou malamalama, ia faifaimea faatasi, aemaise o se avanoa e toe faaolaola ma faamausali ai a latou tu ma aga faasamoa na ola a’e ai, ia latou mautinoa i lo latou faasinomaga e ui ina ta’ape solo i Niu Sila ona o a’oa’oga.
O se taimi e tulimataia e nei fanau a Samoa, auā e ui o loo faatino i Aotearoa lenei Sootaga, ae o se siomaga ua mafai ona toe momoliina o latou lagona ma mafaufauga i le olaga na soifua a’e ai i lo latou atunuu moni o Samoa.
Atonu o le uluai pogai foi lena o lenei fuafuaga a le asosi, aemaise lava mo alo ma fanau o Samoa ia e sikolasipi mai i Niu Sila, ma ua taumamao ese mai o latou aiga ma le atunuu. Peitai ua suia i se vaaiga e lautele atu, le fuafuaga o le Sootaga i lenei vaitau, aemaise ona o le toatele o fanau o loo auai i lenei asosi, o loo numera silia fanau a Samoa na fananau ma ola a’e lava i Niu Sila.
Ona a’e ai lea o se tofa i le komiti faafoe, o le a faaaogā le Sootaga e avea ma taimi e faafeiloai ma faamasani atu ai fanau uma a Samoa o i iunivesite, i vala eseese o le aganuu, ina ia lē gata e latou te iloa ona faatino ma faaaogā, ae ia faatupu ai foi i o latou loto se talisapaia i le lasi ma le matagofie o le Faasamoa.
E faasolosolo i iunivesite taitasi o loo iai o latou sui, le taligamalo i le Sootaga i tausaga taitasi.
O le Sootaga o lenei tausaga na pa‘ū i le aso 2-7 o Iulai, ma sa talimalo ai le asosi a fanau Samoa i le iunivesite a Waikato. Na muamua lava amata i le ‘ava o le feiloaiga na faia i Tokoroa i le Aso Toonai, aso 2 Iulai, 2011, e faafeiloai aloaia ai sui o iunivesite uma sa auai.
Sa tu malosi foi le komiti faafoe a le iunivesite na talimalo, ina ia faatāua ma faamalosia taiala ma tulafono sa faafoe ai le Sootaga o lenei tausaga, ina ia toe faafoi i tua i le aano tonu ma le fuafuaga o lenei tuufaatasiga tāua a fanau Samoa i iunivesite.
Tele vaega eseese sa faagasolo ai le polokalame, e lē gata i fetufaaiga o manatu ina ia faamalamalama atili le aganuu a Samoa.
Sa faia foi ni tauvaga o faiga lauga i gagana uma e lua, faa-Peretania & faa-Samoa, ma isi vala eseese e aofia ai ma taaloga, aemaise lava le itu tau faafiafiaga faaleaganuu, lea foi na toe sola ma le asosi malosi a le iunivesite AUT.
Ua sauni nei la le asosi mai le iunivesite i Aukilani, le UASSA e talimalo i le Sootaga o le tausaga fou, 2012. O iuga nei o le Sootaga 2011:
Faaevagelia:
1st AUTSSA
2nd UASSA
3rd VUSSA
4th WUSSA
5th CUSSA
Lauga faa-Peretania:
1st VUSSA – Moe
2nd CUSSA – Riki
3rd WUSSA – Salavalasi
4th UASSA – Anastacia
5th AUTSSA – Eric Kalolo
Lauga faa-Samoa:
1st UASSA – Sera Ofe
2nd AUTSSA – Suavi
3rd VUSSA – Nikki Perez
4th WUSSA – Hale
5th CUSSA – Saunie
Faafiafiaga Faaleaganuu
1st AUTSSA
2nd UASSA
3rd WUSSA
4th VUSSA
