Soloia le isi moliaga o Lealofi Oto

Ua na o le moliaga o le faaoolima mataga (indecent assault) ua faamaonia faasaga i le susuga Lealofi Oto, sa avea ma faafeagaiga o le EFKS i Saanapu-uta, ae ua faaleaoga e le faamasinoga le faaiuga a se laulau o faatonu na latou faamaonia le moliaga o le taumafai e faatino se faiga aiga faamalosi (attempted rape) sa molia ai foi le ua molia.
O lona uiga e mai moliaga e lua sa molia ai Lealofi, ua na o le tasi le moliaga a leoleo ua faamaonia faasaga ia te ia, ae ua faamama lona suafa mai le isi moliaga. O le taunuuga lea o iloiloga a le alii faamasino o le faamasinoga maualuga, o Vui Clarence Nelson i finauga sa toe tuuina atu e loia, ina ua aumai le faaiuga a faatonu e talia e le alii faamasino le faamaonia o le moliaga o le faaoolima mataga, ae sa ia le talia le faamaonia o le moliaga o le taumafai e faamalosi se tamaitai.
Na faaalia e le alii faamasino e faavae lana faaiuga i le molimau a le tamaitai na aafia, lea e iai vaega sa feteenai ai lana faamatalaga na tuuina atu i leoleo e faatatau i le mea na tupu, ma lana molimau tuu fofoga na faia i le faamasinoga ina ua suesueina mo aso e lua molimau. Sa faamatala e le tamaitai i le faamasinoga e faapea, sa iai lona faamoemoe i le po na tupu ai le faalavelave, o le a sola ese ma le fale o le faifeau, peitai na te lei faamatalaina lea vaega i leoleo.
Sa ia taua foi i lana molimau tuu fofoga sa pupuni lona gutu e le ua molia ma loka le faitotoa o le potu a o taumafai e faatino nisi gaioiga, ae na te lei tauina foi lea tulaga i leoleo. E oo i lana molimau e faapea sa tu le isi ona vae i luga o le moega, a o le isi ona vae o loo tu i luga o le fola sima ina ua pau lona ie ae tago atu loa le ua molia i lona itutinosa, na te lei faailoaina foi i leoleo i lana faamatalaga na fai, ina ua maea le vaiaso talu ona tupu le faalavelave.
O le tasi itu sa faavae ai le faaiuga a le alii faamasino e le faamaonia le moliaga o le taumafai e faatino se faigaaiga faamalosi, ona o le molimau a le tina o le tamaitai na aafia, na ia taua ai se faatoesega a le ua molia, peitai e leai ma se faamatalaga a le tina i lana molimau na taua ai o le faatoesega na mafua ona sa taumafai le ua molia e faamalosi le tamaitai. Na pau le mafuaaga o le faatoesega, ona o se amioga a le ua molia ua sese, ma e atagia e agai lea vaega o le molimau i le faaoolima mataga. O foliga vaaia ma uiga faaalia o le tamaitai na aafia a o faia lana molimau, o le tasi lea itu sa matauina e le alii faamasino a o faagasolo suesuega o molimau.
I le taunuu o le faamasinoga i le faaiuga e le faamaonia le moliaga o le taumafai e faatino se faigaaiga fai faamalosi, ua faatulaga ai o le aso 20 o Aperila 2009 o le a aumai ai se faaiuga o le moliaga e tasi o loo totoe o le faaoolima mataga lea ua faamaonia. O le moliaga e fitu tausaga i le falepuipui le faasalaga maualuga o loo aiaia e mafai ona faasalaina ai se tasi e molia ai ae faamaonia. O le susuga Lealofi Oto ua 62 tausaga o le soifua, ma ua le toe avea ma faifeau talu ona tulai mai le mataupu lenei, ma molia ai e leoleo. E 17 tausaga o le tamaitai na aafia ma ua faasaina e le faamasinoga ona faailoa lona suafa, poo se isi lava faamatalaga e iloa ai o ia, ona o puipuiga malu a le faamasinoga i aafiaga o fanau teine ma tamaitai talavou e aafia i ni soligatulafono tau feusuaiga.