Sailia pea e leoleo tupe na gaoia mai le NPF

O le $420,000 o le penisione a le au matutua na gaoia mai le ofisa o le NPF i le tausaga na tea nei, e oo mai lava i lenei masina o loo tau sailia pea e leoleo le $349,380 poo fea o natia ai, aua e na o le $70,620 tala ua toe maua.
Na toe fesiligia le pulega o le matagaluega o leoleo ma falepuipui i lenei mataupu ona o le tele o faamatalaga salatua o loo taua ai e faapea, e sili atu i le selau afe le tupe na maua muamua, ae e le o fetaui ma fuainumera o le seleni o loo faailoa mai e leoleo.
Faaalia e le Komesina lagolago o le matagaluega, le susuga Papalii Li‘o Ta‘eu Masipa‘u, o loo galulue faatasi pea ma le ofisa o le NPF i le faia o suesuega atili i le fia maua lava o se vaega tele o le seleni na gaoia e lei maua.
O le masina o Iuni o le a suesueina ai i le faamasinoga maualuga molimau a leoleo faasaga i alii e toalua o loo molia i le gaoia o lea tupe tele, le susuga Tautai Fata ma Sione Taateo.
O Tautai ua toe nofosala nei i le falepuipui e faaauau lona faasalaga soloatoa mai le solitulafono o le fasioti tagata faamoemoeina na magalo ai i le palola, ona ua ia toe faia se isi soligatulafono, ae o le alii o Sione Taateo o loo tatala i tua i ni aiaiga ma tuutuuga e faatali ai le aso o le faamasinoga.