O le Aso Sa, 14 Iuni 2015, i le itula e 2 i le aoauli, na matuā faatumulia ai le aai tele o Porirua i le savali faaaloalo a tagata na laei lanumoana ma papae (lanu o le ‘au taalo a Norths Porirua sa taalo ai Jerry), o lē sa logologoa i le taaloga lakapi i Niu Sila ma lana Olopeleki ua lauiloa ai i soo se atunuu o le lalolagi.
E lē tea le manatu alofa o ana uo pele i le taaloga e pei o le susuga ia Ali Koko na malaga faapitoa mai lava i Falani na ia uluai manatu ia faia lenei solo faaaloalo faatasi ai ma le lagolago malosi a sui faipule o le City Council o Porirua ia Izzy Ford ma Litia Ah Hoi faapea le komiti o taaloga i le kalapu o Norths.
Na amata mai le solo tele ma le umi i Waitangirua ma agai atu i le malae taalo lakapi o Porirua i Mungavin lea ua faaigoa nei o le “Jerry Collins Memorial Park”. Talofa i le sagisagi fiafia o nai tamaiti mai le aoga a Corrina, sa aoaoina ai Jerry a o itiiti, ma le haka mālie sa faatinoina i le auala e faafeiloaia le solo tele a le mamalu o le atunuu aemaise o le tele o tagata eseese mai isi atunuu sa faaalia le agaga alofa ma le faaaloalo mo le alii taalo.
Na auai aulakapi e toatele a le Norths, amata mai lava i tamaiti laiti e oo i tagata matutua, faapea le Vikings ma isi faalapotopotoga uma sa mafuta ai Jerry a o soifua. O nai tina ma tamā matutua e lei faavaivai le savali i lea aso e faaali le agaga alofa ma le finagalo faaaloalo mo Jerry. Sa faafeiloai mai le solo tele e le sui o le Komiti tapena le afioga ia Le Mamea Tavaga Afele Seuala ma amata ai loa i le tatalo faasolo atu ai o sui tofia mo saunoaga ia Ali Koko, Tali Lilo, le faipule (Councillor) Izzy Ford ma le sui o le Pulenuu ia Litia Ah Hoi ona faaiu ai lea i se saunoaga faafetai mai le sui o le mamalu o le aiga faanoanoa le susuga/fetalaiga ia Toomaga.
Momoli atu faamafanafanaga a lenei itulau i mātua o Jerry ma le nofo a alo faapea le paia o aiga na lua. E lē galo oe Jerry Collins, ia manuia tele lau malaga.
