O le Aso Gafua o le vaiaso lenei e toe valaau ai le faamasinoga o ni tagata se toatolu o loo molia i le faia o ni auala tau faasese ma le faamoemoe e maua ai ni tupe. O nei tagata e aofia ai se tamalii ma se tamaitai Samoa ma se alii papalagi mai le atunuu o Eleni poo Greek, lea e ta‘ua e nisi o o tatou tagata o alala i fafo o se tagata Kuliki.
O le aliali mai o le mataupu lenei, ua laumanu‘ia ai ma le suafa o se Minisita o le Kapeneta e faapea o se tusi sa ia sainia sa faaaogā e nei tagata e faailoa ai le latou pisinisi lea ua molia ai e leoleo.
O loo natia le faailoaina o le suafa o le Minisita ona ua ta‘ua e se molimau e lei silafia e le minisita o le a faaaogā le tusi na ia sainia e faatino ai se taumafaiga e fesootai ma ni gaioiga solitulafono.
O loo malaga le minisita i ni fonotaga i fafo ma ua lē mafai ona maua ai se avanoa e fesootai i ai mo sona finagalo, ae o le a tuliloaina pea mo sona manatu faaalia i le mataupu ona e toatele nisi o loo fia maua le ‘au o le paipa i le sootaga o le Minisita ia i latou ua molia.
O le avanoa o tusitala na maua i le polokalame masani i vaiaso taitasi ma le Palemia a le leitio o le 2AP i le Aso Tofi na tea nei, na fesiligia ai le taitai o le Malo i sona finagalo i le mataupu.
Mo le silafia o nisi o se ata o le feiloaiga a le Palemia ma ia tagata e toatolu sa vaaia i luga o se fesootaiga televavave faaonapo nei poo le facebook a le alii papalagi mai Eleni.
O loo iai ma le ata o le Minisita o loo laumanu‘ia lona suafa i le tusi na ia sainia lea sa feoai ma i latou nei ma faailoa i ofisa ma isi auaunaga sa latou afea mo le faailoaina o le latou pisinisi e faafaigaluge ai tupe.
O le saunoaga a le Palemia le susuga Tuilaepa Lupesoliai Sailele Malielegaoi, sa ia amia le faauluuluga o le matagaluega o tupe a le Malo, le Kovana o le Faletupe Tutotonu ma le Pule Sili o le UTOS le faalapotopotoga o loo teu faafaigaluega ai tupe e latou te feiloai faatasi ma le sāvali o sui o le pisinisi mai fafo.
Sa faaalia e Tuilaepa na mafua ona ia amia i latou ia ona o faalapotopotoga ma matagaluega ia o loo nafa ma mataupu tau tupe a le Malo. Ina ua mae‘a le feiloaiga ona ia faautuaina lea o le sāvali e sili ona galulue faatasi ma matagaluega a le Malo sa latou feiloai.
Peitai o le lua aso talu ona mae‘a lea feiloaiga ae logoina loa e le Kovana o le Faletupe Tutotonu le Palemia ua maua o se scam poo se faiga pisinisi faatogafiti o loo faia e ia tagata. O le Faletupe Tutotonu na ia ave le mataupu i leoleo ma taofia ai loa le tuua ei latou nei o le atunuu. E faia le gaioiga lea ae ua maua ni molimau mai ni faletupe i le atunuu ua ta‘ua ai le lafoina i fafo e nei tagata o ni seleni tetele e au lava i le selau afe tala.
O le faamatalaga mai leoleo e feololo lava ni tagata faipisinisi ma i latou e malosi le tamaoaiga tau tupe na ave a latou seleni i le pisinisi lenei. O seleni nei e amata mai i le lima afe tala e oo i le tolusefulu afe tala.
O le amataga o le vaiaso ua mavae na tutulai ai i latou nei e toatolu ma e valu moliaga o loo molia ai.
O moliaga nei o le faia o ni auala taufaasese na maua ai ni tupe mai nisi. Faaalia e leoleo e iai nisi tagata sa ave foi a latou seleni i le pisinisi ua agai atu ma faaulu a latou tagi, ma o loo suesueina ma faia ai nisi moliaga faaopoopo.
O loo aafia ai se faifeau i le toatolu lenei peitai o loo iai nisi molimau e faapea o lea tamalii e lē o se faifeau, ae o lona maota o loo faia ai le polokalame a le ekalesia Katoliko o le Divine Mercy.
O le tamaitai Samoa o loo molia e faamautu i Lonetona i Peretania. O loo iai se talosaga a le latou loia ua taoto i le faamasinoga ua finauina ai le faia o se poloaiga a le faamasinoga e taofia ai le faasalalauina o suafa o i latou.
O le aso 22 o le masina nei o Iuni o le a suesueina ai le talosaga lenei ma aumai ai se faaiuga e iloa ai le talia poo le teena o le talosaga.
