E ui i le louloua o timuga i le aoauli o le Aso Toonai na se‘i mavae atu nei, ae e lei faaitiitia ai le lagolagoina o toe taaloga i sailiga finals sa faataunuuina ai i lea aso. O se taamilosaga umi toe lelei atoatoa i sauniuniga a kalapu taitasi faapea foi afioaga o loo auai ai.
Mai le amataga o taaloga o lenei taamilosaga i le tausaga nei, sa toe fetuunai taaloga ona ua maua i le amataga o le taamilosaga le lē auai ai o nisi o ‘au e lua. Ae sa lē avea lea ma auala e faavaivai ai le pulega atoa ai ma le komiti o taaloga i le faaauauina pea o le taamilosaga e aunoa ma ni faafitauli.
E tusa ai ma le faagasologa o le taamilosaga sa iai, e lua Pools sa faagasoloina ai nei taaloga, o le vaega i le Pool A faapea le Pool B. Ma o le tele lava foi o ‘au sa tausinio i lenei taamilosaga e mai i afioaga ma nuu i Samoa faatasi ai ma le Nations mai Avondale.
O le Nations o se kalapu malosi tele i taamilosaga ua mavae, e faamaonia lea lipoti i tausaga taitasi o oo atu ai lava taumafaiga a lenei ‘au i le sailia lea o le Ipu autu. O se tasi o malosiaga o loo maitauina e le tusitala agai i le kalapu a le Nations, o loo latou faatāuaina le Atua i le lotoifale o le ‘au.
E tāua le taalo ae sili ona tāua le taalo ma le fiafia ae faasilisili le Atua; o nisi ia o malosiaga a le Nations, aemaise ai lava le tapuaiga a le faafeagaiga atoa ai ma tino matutua o le Au, i avanoa uma latou te feiloai ai.
I lenei foi la tausaga, ua laasia e le Nations le moe mitiga sa taumate pe tua i ni ā. Ua faafiafiaina le tapuaiga atoa ina ua uuina le Ipu o le Siamupini, le Talita, ma e matagofie le tulaga felafoai sa iai le taumafaiga a ‘au uma e lua, e iloa i le faigata ona kolosia laina sikoa o nei ‘au uma ona o le lava saunia lelei.
A o sauni atu le Nations i le toe taaloga, na pei sa tau iite lagona o le tino ina ua vaaia ua masii mai le tapuaiga i le malae i lea afiafi, mai lava i le fanauiti e oo lava i tino matutua. Ua sola nei la le Nations ma le Siamupini ae o loo faaolioli mai foi ma le samiga o le siamupini aemaise le Sponsor e le My Samoa i Kelston.
