Ua iai se faaopoopoga i le galuega tau femalagaaiga ua faatautaia nei e le avefu‘a a le atunuu le Polenisia.
O se vaalele o le ituaiga o le twin otter lea na faatau mai e le kamupani mai i Kanata ua faaoopoopo i isi vaalele o le ituaiga lea e lua o loo faatautaia nei le auaunaga o femalagaaiga i le va o Samoa e lua. Faaalia e le alii Palemia, o se nonogatupe na faia e le kamupani ae faamaonia e le Malo na sau ai le vaalele lenei mai Kanata.
Faaalia e le alii Palemia o loo iai foi fuafuaga a le kamupani o le Polenisia ina ia maua nisi vaalele se lua i le lumanai e faaopoopo i vaa ia ua iai nei.
O le taimi lenei e na o le kamupani vaalele lava a le Polenisia lea o loo faia le auaunaga o vaalele ua feoai i le va o Upolu ma Pago Pago. O le Inter Island Airways, le kamupani vaalele a Amerika Samoa sa fealuai i le va o Tafuna ma Faleolo, ua latalata nei i le tausaga e lei toe faaauau lana auaunaga.
Sa faatali le toe faaleleia o se tasi o ana vaalele e lua ai ona vaa e fealuai i le va lea o motu. E lei toe iai lava se faamatalaga poo fea ua agai i ai nei fuafuaga.
O le vaalele o le Samoa Air lea foi na tele i ai lipoti i le fua o le mamafa o ana pasese ma sau ai le faaiuga pe malaga i lea vaalele pe leai foi, o lea ua agai ana auaunaga i puipuiga o ogasami o Samoa ma le Pasefika.
O se maliega ma se kamupani Ausetalia o loo faafaigaluega e le Malo o Ausetalia, lea ua maua ai lea avanoa fou e taulai i ai le auaunaga a le Samoa Air.
O le faamatalaga a le alii pule o le Samoa Air ia Chris Langton o se auala lea ua agai i ai ina ia mautinoa e faaauau le auaunaga auā ua leaga foi le isi vaalele a le kamupani.
O lea foi la ua mae‘a faatau e le Samoa Air se isi vaalele mo le faatautaiga o ana auaunaga i le puipuiga o gataifale o Samoa ma ona motu tuaoi. Ae o loo tatala pea ana auaunaga tau i le felauaiga o pasese ia e faalauiloa le totogi pau o pasese e fia malaga i Savaii.
O le isi lea lu‘i a le Palemia na ave i le kamupani o le Polenisia, ina ia le gata e faaauau ona faalautele le kamupani e ala i ana vaalele, ae ia mafai ona maua uma femalagaaiga i totonu o Samoa aemaise foi totonu o Amerika Samoa i le va lea o Tafuna ma Manu‘a. Ae o le itu tāua lava o le mafai e le Polenisia ona toe amata femalagaaiga mai i Upolu i Savaii.
“O le igoa o le vaa fou lenei o le Savaii, ia afea i tou fuafuaga se faigamalaga se tasi i Savaii,” o le saunoaga lea a le Alii Palemia.
“O se faalumaluma tele i se kamupani le lē mafai ona faatino femalagaaiga i isi vaega o le atunuu, aemaise o Savaii e telē mamao atu nai lo Upolu,” o lana lu‘i lea ua avatu i le pulega o le Polenisia.
