Smith Wigglesworth – O le Aposetolo o le Faatuatua Vaega 6

O le tagata faatuatua e leai se mea e tapulaaina lona faatuatua. Sa toe faapea atu nei Smith, “Atalii o le taimi lava e papai atu ai o‘u lima i luga ia te oe, o le taimi foi lena e faatumuina ai le potu i le mamalu o le Alii ma o le a le mafai ona ou toe tu i luga, o le a ou pau i lalo ona o le malosi o le mamalu o le Atua.
Ua moeiini nei mata o le tamaitiiti ma‘i ae faaee atu loa ma lima o Smith. E pei o se sipaka i se eletise le pai atu o le mana o le Agaga Paia. Na faafuasei ona alaga ma le leo tele le tamaitiiti ma faapea atu, “Ua faia lenei mea mo lou viiga”. Sa faapea lava ona taatia Smith i luga o le foloa o le fale ae ua tu ane nei i luga le tamaitiiti ma fai ona ofu.
Sa faapea ona toe alaga atu le tamaitiiti ma le leo tele ua faapea, “Ua faamaloloina au e le Atua. Ua ou maloloina, ua ou maloloina”. Na laga mai nei matua o le tamaitiiti i le potu lea o loo iai Smith, na faafuasei ona pauu ai foi ma i laua i lalo i le mana o le Agaga Paia.
Na faalogoina le faatumulia o le potu i le mamalu o le Atua. O se lagona uigaese le paia o le Atua. Sa iai faatasi i lea aso le tuafafine o lenei tamaitiiti sa ma‘i i lona mafaufau. Peitai na maloloina ai foi ma ia e aunoa ma se tatalo na faia ona o le malosi o le mana o le Atua.
Na logo le nuu atoa i le mea ua tupu ma sa faapea ona auauai mai tagata e fia vaai i le mea ua tupu aua ua iloa uma le tulaga na iai le tamaitiiti. Na afua i lea aso ona faatuatua le toatele o tagata i le Atua ma tuuina atu o latou ola mo le Alii. Ua amata nei ona faatupulaia le faatuatua o Smith.
Ua aoaoina o ia i le taua o le faatinoina o le faatuatua. O le faatuatua e faatino lea e ala i le mea o loo musuia ai e le Atua.
Fai mai le aoaoga a Smith, pe a ia valaauliaina tagata ina ia o mai i luma i le taimi o le sauniga e faapea “Afai e futu le umi o lau laa mai i luma o le a faapea ona faamanuiaina oe. Afai e iata lau laa mai i luma, o le a faapea foi ona faateleina lou faamanuiaga. Ae afai e te laa mai i luga o le mea o loo ou tu ai, o le a faapea ona faafeiloaia e le Atua ou manaoga”.
O le ituaiga o faatuatua lea na faamalosia e Smith i taimi e faia ai lana valaau i tagata. O le faatuatua e le masalosalo. O le faatuatua usitai. O se tasi aso na faapea ai ona sau se tasi o tina mo se tatalo o le faamalologa i lona gasegase o le TB. A o savali mai le tina lenei sa faatonuina o ia e Smith ina ia tamoe faataamilo i totonu o le fale pe a maea ona ia
tatalo.
Na maea ona tatalo Smith ma fai atu i le tina lenei ina ia tamoe. Peitai e lei fia tamoe le tina ona e le o mautonu o ia. Na valaau atu Smith, “tamoe, tamoe faataamilo” ae valaau mai le tina, “e le mafai faamolemole, e le mafai ona ou tu”.
Na faateia le fafine ina ua fai atu Smith e faapea, “aua nei e toe tali mai ia te au ae tamoe. Fai le mea lea ou te fai atu ai”. Peitai e lei mafai ona faia e le tina lenei le faatonuga. Na oso mai i lalo Smith mai le nofoaga maualuga o loo iai, ma ia uu le lima o le tina lenei ma amata loa ona ia faatamoeina o ia i totonu o le potu tele o loo fai ai le sauniga. Na iu ina mafai ona tamoe le tina ma maua loa lona malosi.
O se tasi foi tina sa iai i totonu lava o lea potu sa maua i le mai pipili ona o le faaletonu o lona tua.
Na fai atu Smith i lenei tina ina ia tu i luga e tamoe. Peitai e lei manao foi lenei tina e tamoe. Sa faapea foi ona oso atu Smith ma tulei i lalo lea tina. Ona ia tago atu lea ma uu le lima o le tina lenei ma la tamomoe faatasi i totonu o le fale.
O nisi taimi e le na ona lauga o Smith i le taua o le faatuatua, ae sa ia faailoa foi e ala i ana galuega faatino. Sa ia saunia ni tausamiga e fafaga ai tagata matitiva ma fia taumafa. Sa fiafia le toatele i le tele o taumafa i na taimi. Na faaaoga foi e Smith na taimi e faatulai ai nisi e fai a latou molimau i ni faamalologa na faia ia i latou. Sa vaaia lava le ootia o le aofia sa auai i na taimi.
O taimi foi ia o a latou faigaai poo tausamiga e faatulaga ai e Smith fuafuaga mo isi faigaai o le a sosoo mai. Ina ua maea la latou uluai faatasiga, ona faia lea e Smith se faasilasilaga e faapea:
“Sa matou faafiafiaina outou i le afiafi nei. I le Aso Toonai a sau, o le a toe fai foi se isi a tatou faatasiga. O outou uma sa auai mai i lenei afiafi i o outou mafatiaga ma ma‘i o le tino, lea na autausagā o tou saili fofo ai ae aunoa ma se manuia, a o lenei ua faamaloloina outou i le asō. O le vaiaso a sau, o le a matou faalogologo atu ai ae sasaa mai a tou molimau, i le malologa ua faasaoloto ai outou i le suafa o Iesu.” Ma ina ua fesili Smith, “O ai o fia maua se faamalologa?”
E leai se tasi na faatuiese. O le tina na toso mai le wheelchair ua savali nei i lona aiga. O lē na sefuluvalu tausaga o faatauga i le ma‘i māliu, ua malolo ma e lei atoa se lua vaiaso a ua maua lana galuega. O le tamaititi sa mai ua faafuasei ona malolo, ma alaga atu i lona tamā, “Papa, Papa, Papa. Ua faamaloloina au.”
Na faasolo pea vaiaso o gasolo ane tagata mo faamalologa, ma sa faagasolo foi a latou faigaai ma fai molimau a i latou na faamaloloina. Maeu ni taimi ua toe faaolaola ai le faatuatua, ona o le talia o le Upu a le Atua.