O se galuega maoa‘e lona taugata ua tatalaina nei o le malumalu tapuai tutotonu o le Ekalesia Aso Fitu Samoa Tutoatasi e sefulu miliona, 330 afe tala. O le tau atoa lenei o le galuega ua aofia ai ma le silia i le tasi le miliona tala o le sao o tupulaga talavou o le ekalesia e ala mai ia latou sailiga tupe sa faatino lea sa lē malolo ai i aso taitasi o le vaiaso seia vagana le sapati e faatau savali le faapapa, o keke puaa ma pani penu poo german bun.
O le tatalaina o lenei galuega tele e lē gata o le malumalu ua avea nei ma se tasi o vaaiga uigaese i le taulaga o Apia lea o loo i Saleufi i le vaega ua iai le fanua faatau o le ekalesia, ua faailoga ai ma le atoaga o le 35 tausaga talu ona faatuina ma ua ese ai lona pulega mai le Ekalesia Aso Fitu o le Toe Afio Mai o loo i Lalovaea.
E lua tausaga na fausia ai le malumalu faatasi ma isi maota tetele o le ekalesia mo a latou sauniga ma fonotaga faavaomalo ma o Setema o le tausaga ua mavae na fuafua e tatala ma umusa ai. Peitai o le tuai taunuu o totoga o le galuega lea sa fausia e se konekarate mai Saina, ae o le itu tau tupe le isi mafuaga na toso ai le faamoemoe ae faatoa faamae‘a ia Setema o le tausaga nei ma tatala ai loa i le Aso Lua o le vaiaso na tea nei.
Sa auai le afioga i le Ao Mamalu o le Malo ma lana masiofo o taitai o le Malo i minisita o le Kapeneta faapea le auvalaaulia ma sui o le ekalesia mai fafo faapea ma Samoa.
O se tasi lenei o galuega tele ua vaaia i totonu o le taulaga o Apia, ua faaopoopo i vaaiga o Malumalu tetele o isi ekalesia o loo i le taulaga.
Na faaalia e se tasi o tagata lotu o le ekalesia, sa tele tala a tagata i le taimi na aafia ai le nofoaga muamua sa iai i le vaega ua fausia ai le Malumalu fou ina ua mu i le afi. Peitai sa lē avea ia faamatalaga taufaifai e faavaivaia ai le agaga finau o taitai o le ekalesia ma tagata lotu i le tatalo ma galulue e saili seleni e toe fausia ai se nofoaga autu fou o le ekalesia.
Ua faaalia e se isi tagata o le ekalesia o le a na o sauniga tetele e tuufaatasi ai aulotu uma e faaaogā i ai le Malumalu, ae e lē o iloa se isi fuafuaga i le lumanai. O loo iai nisi o nofoaga o lenei ekalesia i Fugalei i le agai i le nofoaga o loo iai se tasi o faletalimalo ma se fale kalapu lea sa iloa i le igoa o le Tropicana.
