Ua masua mai i fafo ni molimau malolosi ua ta‘ua ai masalosaloga i le aafia o se sui tauva mo le palota tele i le tausaga fou i ni gaioiga faaalatua i le faatosinaina o tagata palota.
O le faamasinoga talu ai nei i le talosaga a se tasi o matai o Tanugamanono le afioga Tupuola Afa Lesa, ina ia toe iloilo le faaiuga a le faamasinoga maualuga i le totogiina o le taui tupe e valu selau afe i le aiga o Faumuina Tutuila, na faaalia ai e le loia a le aiga o Faumuina o Ruby Drake i lana folasaga e iai se tagata o loo fuafua e tauva i le palota o le tausaga fou, na ia totogi le $28,000 o se vaega o le taui tupe mo ni masina sa tuai ai ona totogi se vaega o le taui e pei ona faatulaga mai ise faaiuga a le faamasinoga maualuga na fofogaina i le masina o Aukuso o le tausaga ua mavae 2014.
O nisi o matai o Tanugamanono na aafia i lea mataupu ua faailoa lo latou lē mafai ona totogi le taui ma ua faamauina ai le latou tautinoga o le gau mativa. O i latou ia o ni sui palota o le itumalo o Vaimauga i Sisifo.
Na fesiligia le tamaitai loia o Ruby Drake poo ai tonu le tagata na ia faailoa i lana folasaga na totogiina le 28 afe tala. Peitai na soisoi le tamaitai loia ma ia faapea mai i le tusitala e lelei ona fesili i sui o le aiga o Faumuina Tutuila o loo ia tauaveina le latou itu.
Na tapa loa se faamatalaga mai le tamaitai o Afu Faumuina, ma ia talosaga mai ai e sili ona taofi le suafa e aua le faailoaina se‘i alu pea le mataupu ona ua i le faamasinoga, ma e oo lava ina aliali ai. Ua iloa e le tusitala le suafa o le sui lea ae o le a taofia pea ona faailoa lona suafa se‘i iai se taimi.
O lea ua matuā faamamalu le aiaiga o le tulafono o faigapalota ua matuā tapu ai ona toe faia ni faatosina solitulafono e ni sui o loo sauni e tauva i le palota tele. O lea aiaiga ua matuā tapu ai lava ona ave ni tupe, meaai, avamalosi ma soo se mea lava i se tagata palota seiloga ua mae‘a le faiga filifiliga a le atunuu.
Ua lē o toe iai se aiaiga o le ave o ni oo poo ni momoli a sui tauva ma sui faipule, ae faatoa faatino lea tulaga i totonu o le 12 masina mai le taimi na mae‘a ai le faiga palota. O le sui ua laumanuia lona totogi o le luasefuluvalu afe sa nofo aitalafu ai nisi o matai o Tanugamanono o loo ia umia se tulaga faaaloalogia ma taualoa i le tomai tau tulafono, ma sa tauva foi i se tasi o faigapalota tele a le atunuu mo le nofoa o le itumalo o le Vaimauga i Sisifo.
