O le sauni atu o le alo o Samoa ia Alex ‘LionHeart’ Leapai mo le fusuaga auā le Fusi o le lalolagi i le aso 26 Aperila 2014, ua siitia ai pea le igoa o Samoa i le lalolagi atoa aemaise ai Ausetalia nei. E lei mamao atu na taliu mai ai i Samoa auā le talosagaina o faamanuiaga a aiga ma afioaga aemaise le Ao o le Malo, Kapeneta ma le Atunuu. O le masani lava lea a alo ma fanau e aumau ma taaalo i atunuu mamao pe a sauni atu i faiva tetele o a latou faagatama. O le 1984 na tuu alu ai Michael Jones i Samoa e tautua ma taalo mo le taitoafitu a Moataa a o talavou ma fesoasoani i ai nisi tuai o le Manu Samoa i la latou kalapu seia oo lava ina filifilia i le aufili a Aukilani. Na taliu atu o ia ma taalo muamua mo le Manu Samoa i le 1986 a o lei faoa e le Olopeleki ma sau ai lava ma avea ma siamupini o le numera fitu faapea le Ipu o le lalolagi i le 1987.
I le tausaga e 2000 na malaga atu ai foi Toaletai David Tua mo faamanuiaga a le atunuu lea na avea ai ma Samoa muamua ua luia le Fusi o le lalolagi i le paga mamafa. I lea lava foi vaitau na siamupini ai i lana aupaga mo le fusi o le lalolagi Maselino Masoe. Sa faapea foi le alii faitifaga iloga ia Dwayne the Rock Johnson lea e lotonuu lava mai lona laiitiiti aemaise le sao o lona tuaa ia Fanene Pita Maivia i piiga faapolofesa, sosoo mai ai ma lona tamā ia Rocky Johnson. O le tausaga 2004 na malaga atu ai le Rock i Samoa ma tauaao sana meaalofa i le Maota mo tagata matutua i Mapuifagalele ma faaee ai lona suafa matai ia ‘Seiuli’ e lana afioga i le Ao Mamalu o le Malo le Tapaau Faasisina Malietoa Tanumafili II a o soifua.
E lē gata i lea o le alo Samoa Ausetalia ia Tim Cahill mai Salailua ma Tufuiopa i Apia e tapuaia lava e le tina o si ona tina lana soka a o taalo i Sini nei, ma see atu ai i Milwall, Everton, Socceroo ma Amerika. O se alii Samoa e lotonuu tele ma alofa i lona aiga e atagia i lona faailoaina lava o Samoa i soo sana talanoaga i TV, nusipepa, leitio ma faasalalauga i le lalolagi atoa.
I totonu o Ausetalia o loo taaalo ai tama ma teine e tupuga mai Europa, Asia, Peretania ma Aferika i le soka mai le vaega laiti i au sinia, ae na o Tim Cahill lava le Samoa o loo filo ai ma maua faaeaea maualuluga talu mai faamanuiaga a lona aiga, atunuu ma le silisili ese.
I totonu o le lakapi Iuni na malaga ese loa Digby Ioane tau faaletonu le Ualapi ma le Reds ae faafetai o lea ua gasolo ane le isi tupulaga fou ia Ben Tapuai, Scott Sio, Joe Tomane, Matt Toomua, Peter Betham ma le aufili a Tama aoga ia Fred Saaga ma nisi. I le lakapi liki ua na o ulutala ia SBW poo Sonny Bill na amata mai lava i le 2008 lea na ia tuua ai le Bulldogs talu lona tusifolau Samoa. E oo mai i le taimi nei ua siamupini uma ‘au e taalo ai lenei alo o Samoa ma ua feololo foi i le taaloga faipele. O se tama e iloga lona lotonuu i le tatau i lona aao ma ua iloa ai e le lalolagi o le Samoa.
I faipelega o loo iai foi i Sini nisi toa i paga māmā e pei o Lawrence Tauasa o loo iai fusi e fā o le lalolagi, Junior Talipeau, Tai Tuivasa ma Krayze Dave. O se taimi o i luma o le a faafofoga atili i ai le lalolagi, ae ua avea nei le sauni atu o Alex Leapai e fai ma taualuga mataina pe a faamanuiaina, i sao o nei alo iloga uma o Samoa i Ausetalia nei. E lē gata o le faalauiloaina atili ai o le igoa o si o tatou atunuu, ae o le avea foi ma faamalosiau i tupulaga talavou ina ia latou mautinoa, e taunuu uma a latou miti pe a galulue malosi ma faamaoni i auala e ausia ai.
