O le taaloga lona lua a le Samoa A ma le aufili a Tonga A i le vaiaso nei e tatau ona manumalo ai ina ia faigofie so latou auala i le suega siamupini o le Ipu a le Pasefika (Pacific Cup 2014).
O le Aso Faraile na te’a nei na taaalo muamua ai le Samoa A ma le Waratahs A i le malae a Eastwood i Sini ma manumalo ai Waratahs A e 17-14. O se taaloga na mataina ma sa ono manumalo ai Samoa aepeitai na misi ni kiki i le pou se fā semanu e sili ai o latou ‘ai ma manumalo ai. O se tasi o nei sala na misi ua ta le logo e uma ai le taaloga.
E ui i lea na faataututu le Samoa A ma le Tahs lea na taaalo ai nisi o sui o le Supa 15 e pei o Ben Volavola ma isi. E ui o le tinoiti o nisi o le au a Samoa ae sa vaaia le malosi (fit) toe lelei le faaaogāina o le polo. Na maofa le aumaimoa i le pue masani a tama Samoa i le malosi toe lelei (legal) na solomuli ai le au a Niu Sau Uelese i tele o a latou osofaiga. Na mataina foi le taitaiina a le kapeteni ia Maselino Paulino ma lona soatau ia Falemiga Selesele lea sa tele taimi e momoe ai ma le polo ma amata ai osofaiga mamao mai le luasefululua a Samoa. E taitasi sikoa a au e lua ma na maua uma i le ‘afa mulimuli ae peitai o la tatou sikoa mataina na amata atu i tua o le ‘afa i se gaioiga a le laina i tua ma sao atu ai i luga o le laina le fulupeki ia Fisaga lea e mai Aleipata ae taalo ia Apia Maroons ma faapalasi i le tulimanu.
O se sui tuai na malaga mai i lea au o le susuga a Anitelea Tuilagi i le laina i tua faapea Rudy Meredith. Na faailoa e le faiaoga ia Mailo Potu Leavasa o le sini o lenei au ia atiae tama taaalo mo le sauni atu mo au tetele e pei o le Manu Samoa. O se avanoa lelei lea e fetaui ai ma sui o loo taaalo i le Supa sefululima ma tauvaga maualuluga i Iapani ma Argentina lea ua ofi mai i le tausaga nei. O sui o le pulega e aofia ai Stephen Betham lea e fai ma Faufautua, Aloi Alesana le taitaimalaga faapea JP. O le mae‘a o le taaloga ma Tonga A e tuua ai Sini mo Canberra e fetaui ai ma ACT XV ma Argentina Pampas na iloa ai lea pe sao i le sailiga siamupini e toe faia mai i Sini nei. O le isi pulu a Fiti A, Reds A, Force A ma Japan A o le ilo mai ai la latou lua pito i luga mo le Ipu autu.
