O le faalauiloaina o le Lipoti i le tulaga o le suavai i atunuu o le Pasefika 2012, o loo taua ai le tulaga siitia ua i ai le suavai e maua e atunuu o le pasefika, peitai o loo tumau pea lu’itau i le toe siitia atili ai le auaunaga.
O le potufono o le Faletalimalo a le Elisa na faataunuu ai lea faamoemoe i le Aso Lua 14 Me 2013.
O le lona lua lea o lipoti ua saunia e le Asosi o Vaega tau Suavai i le Pasefika, pei ona faalauiloa i totonu o le atunuu.
I lea lipoti o loo taua ai e faapea, e tusa ma le 1.8 miliona tagata o loo sapalai agai i ai le suavai, a e afa miliona i latou o loo faatino ai le auaunaga o vaega tau suavai lafoai i totonu o le Pasefika.
E lima vaega na agai iai le faatinoina o lea sailiiliga na faatautaia e le Asosi, e aofia ai le faatinoga o le auaunaga, tuuina atu o le suavai mo tagata, o le auaunaga o loo ofoina atu, o le puleaina o tagata faigaluega aemaise o le fuafuaina o seleni mo le faatinoina o galuega.
I le saunoaga autu a le Afioga i le Palemia, Susuga Tuilaepa Dr. Sailele Malielegaoi, na taua ai le taua o le nofo silafia o tagata o soo se atunuu, i le tulaga o loo i ai a latou suavai.
O lea foi lipoti e pei ona faalauiloa, na saunoa Tuilaepa e taua le faalauiloa ina ia silasila atunuu o le Pasefika poo faapei le faatinoina ma le faasoasoaina o seleni o loo maua, aua le siitia o tulaga o le suavai i totonu o soo se atunuu.
O le auina atu o le suavai e pito sili ona lelei mo soo se atunuu o le Pasefika, o se auaunaga sili lea ona taua e pei ona taua e le Afioga i le Palemia.
“E tatau ona maua e atunuu uma o le Pasefika le suavai aupito sili ona lelei.”
Peitai na taua e le Faatonu Sili o le Pacific Water & Wastes Association, Latu Kupa e faapea, e ui ua siitia le tulaga o le faagasolo o le auaunaga mo le suavai i atunuu o le Pasefika, peitai e i ai lava nisi o vaega e tatau ona siitia atili.
O nisi o ia vaega e aofia ai ina ia toe siitia le suavai maua, ia siitia atili le tali atu i manaoga tau suavai aemaise ia siitia le tomai ma agavaa o tagata faigaluega.
I lona faatulagaga o atunuu o le Pasefika i le lipoti a le Asosi, o Pohnpei i le Atu Setete o Micronesia, ua faaigoaina o i latou ia ua tulaga ese i le faatinoga o auaunaga tau suavai i totonu o le Pasefika o le Tausaga 2012.
O le Pulega o Suavai a Fiti o loo faatulagaina o se auaunaga pitosili ona lelei i vaega tau otaota ma suavai lafoai. O le atunuu e pitosili ona lelei i le auaunaga e tuuina atu mo ona tagatanuu, o Papua Niu Kini.
O Toga o loo faatulagaina o se atunuu e lelei lona faasoasoaina o seleni i le faatinoina o galuega tau suavai, a o le Pulega o Suavai a Samoa, o se atunuu e pitosili ona lelei i le puleaina o tagata faigaluega.
I le faatinoga o lea galuega e 22 pulega ma vaega o suavai i totonu o atunuu o le Pasefika na faatino ai lea sailiiliga.
