Ua amata faagasolo le auaunaga a le Matagaluega o le Soifua Maloloina, mo le faatautaia o siaki mo le itupa o alii i Upolu ma Savaii.
O le faataunuu ai o lea polokalame, na faatumulia ai le Fale Samoa o le Pulega o Tagata Tafafao Maimoa mai Fafo i le mamalu o alii na auai atu auā le faataunuuina o lea faamoemoe, i le Aso Gafua 6 Me 2013.
O le naunautaiga a le Matagaluega ina ia tuliloa faiga faavae ma alafua ua mae‘a ona faataatitia auā se Samoa soifua maloloina.
Na maua le avanoa e faatalanoa ai se tasi o sui o le Palemene, Afioga, Afoafouvale John Moors, na ia ta‘ua ai le tāua ma le aogā o lea polokalame mo le latou itupa.
“E toatele e iai le latou manatu o la lava e soifua maloloina, peitai tatou te lē faamaoniaina lena tulaga se‘i vaganā ua faatino a tatou siaki e pei ona iai le asō.”
Na faafetaia le tofa mamao a le Matagaluega o Soifua Maloloina ona o le faatupu manatu ma faatupu lagona i le mamalu o le atunuu, ina ia faatāua le soifua maloloina lelei, e ala i le faia o siaki faalesoifua maloloina.
Na faapea foi se manatu o le Afioga ia Lealailepule Rimoni Aiafi, o le Sui Faipule a le Vaega Faaupufai a le Tautua Samoa.
Na saunoa Lealailepule e faapea, e lelei lava le fai ma siaki lo tatou soifua maloloina poo lelei.
“Aua tatou te manatu māmā i le galuega a le Matagaluega, auā tatou te lē o silafia poo afaina o tatou itutino i ni faama‘i.”
O tausaga faatapulaa mo lea faamoemoe o le 18 agai i luga le matua. A o lei faataunuuina lenei faamoemoe na muai faatino e le Matagaluega ni aoaoga se lua, i le aso 10 Aperila 2013 mo alii i le motu i Salafai, a o le aso 12 Aperila mo le motu i Upolu.
O ia aoaoga na faavae i luga o ni suesuega faalesoifua maloloina i mataupu ua tele ina aafia ai le soifua maloloina o alii o le atunuu.
I sailiiliga a le Matagaluega e pei ona faaalia i luga o se pepa o faamatalaga e faapea, na maitauina ai o le itupa malosi, e mafuli i ai le maualuga o i latou e taumafa ‘ava malosi, toatele ai e taumafa tapaa, aemaise toatele ai foi i latou e lē tausasami i meaai e maua ai le soifua maloloina.
O ia faiga e pei ona maua i sailiiliga a le Matagaluega, ua faatupulaia ai alii ua aafia i nisi o gasegase e aofia ai le kanesa o nisi o vaega o le tino, ma‘i o le fatu poo le fatu pe faafuasei, o faama‘i o feusuaiga ma isi.
O vaega e pei ona faatautaia agai i ai siaki, o le siaki o le kanesa, suka, toto maualuga STIs/HIV ma isi siaki tāua.
O le motu i Salafai na faataunuu lea faamoemoe i le aso 29 Aperila – 3 Me 2013 i le fale o le Matagaluega o Tina ma Tamaitai, Tu ma Aga Fesootai i Savaii.
“E tāua tele le mautinoa o loo atoatoa le malosi maloloina mo le itupa malosi, auā le tautuaina o aiga, nuu ma alalafaga,” na saunoa ai le Ofisa Sili o Pulega, Palanitina Tupuimatagi Toelupe.
