O le manumalo mataina a le Waratahs e 33-32 a le Crusaders i le sailiga siamupini o le Supa sefululima, o se taimi muamua lea ua faaeaina ai Niu Sa Uelese faapea le iai o alo iloga o Samoa ia Alofa Alofa, Will Skelton ma Peter Betham.
Faatoa manumalo ai foi lea o NSW i le Crusaders talu mai le sefulu tausaga ma o se galuega tele na saunia e le faiaoga ia Michael Cheika na taunuu mai Farani lea sa galue ai i le 2012 ma amata tapena le au.
Na vave sili ‘ai o le Waratahs 14-0 faatoa amata le taaloga mai le sikoa muamua a Adam Ashley Cooper ma sala e tolu na ova a Bernard Foley.
O Alofa Alofa na amata i le uigi taumatau lea sa mataina ai foi lana sikoa i le taaloga o le semi ma Brumbies. Sa puipui malosi ma lelei foi ana osofaiga i le taaloga ma le Crusaders lea na iu lava na sao faalua ai Adam Ashley Cooper.
O le alii loka ia Will Skelton i le loka lea na suitulaga atu i totonu ina ua sili Canterbury 23-20 i le ‘afa mulimuli ma na iloga le suia o le malosi o le ‘au i lea taimi. Na faaauau ai i lena taimi le mataina foi o lana tamoe mai le semi ma Brumbies sa vaovao gata ai Skelton.
E le gata i lea o le iai o le susuga Peter Betham i le nofoa o le ‘au faaleoleo na atili malosi ai le Waratahs. Mo le alii o Betham o le manumalo a le Waratahs o se fiafiaga tele auā o le vaiaso foi ua tea na toe aami mai ai e le Wallabies Peter Betham e sui tulaga i le uigi mo Henry Speight ua lavea.
Na vaaia le toe ola mai o le Crusaders mai la latou sikoa mai ia Nadolo aemaise sala na ova a Colin Slade mo le 32-30 toe lua minute o totoe. Ae peitai o le sala a le kapeteni ia Richie McCaw i se ruck na maua ai loa le avanoa o le Waratahs.
E lei sasi le vae o Foley ae na fafao lelei le sala i va o pou ma manumalo mataina ai mo le taimi muamua.
