O le siamupini a le autaitoafitu a le Newcastle Falcons i Egelani i le tauvaga a le North Division Premier na vaaia ai le mataina o le taalo a le alii Samoa talavou ia Brian Tuilagi na o le sefuluiva tausaga. O Brian o le alo o Lauaki Fereti Tuilagi ma Margaret Polly Godinet Tuilagi o loo aumau i Egelani.

O le afioga Lauaki Fereti Tuilagi o se sui muamua o le Manu Samoa ma le Toa Samoa mai le afioaga o Letogo, Fogapoa ma Fatausi ma ua iloga i lana tautua mo nai ona aiga ma uso lakapi ua aumau nei ma taaalo faapolofesa i Egelani ma Farani i le taimi nei.

E aofia ai Henry Ene Tuilagi, Alesana, Anetelea, Vavae ma le sui iloga o le au a Egelani ia Manusamoa Tuilagi. O le tulai mai la o le alii talavou ia Brian Tuilagi ua ia sosoo ai nei le taleni iloga a uso (uncles) a lona tuaa. Ua iloga foi i Samoa le talenia o le tina o Brian ia Margaret Polly Godinet Tuilagi se sui iloga o le aufili Soka a tamaitai o Samoa faapea le taaloga o le Hockey na taalo ai i le kalapu siamupini a Lion Hearts i Samoa.
O le 2010 na aami ai e Samoa e faiaoga mo lana aufili Hockey ae lei toe taliu atu i Egelani lea ua faauuina ai i se faailoga tikeri faasaienisi.

E ui o le talavou o Brian Tuilagi lea e faaigoa ia Muliagatele Brian Lima e matauina lava le maualuga ma le tinoese mai lana au atoa taitoafitu a Newcastle Falcons.
Na faailoa mai foi e lē toe umi se taimi ae faatasi o ia ma nai uso o lona tamā (uncles) ia Anitelea faapea Alesana lea ua piki foi e le Newcastle Falcons.

O se vaaiga matagofie tele o le a iai le taaloga i le au e tasi o i latou uma e toatolu. O le 2004 na ausia ai e lenei auso iloga se matatia i le Apia Paka lea na taaalo uma ai le toafā i le taaloga e tasi e aofia ai Lauaki Fereti, Henry Tuilagi, Alesana ma Anitelea Tuilagi.
Brian Tuilagi ma lana autaitoafitu siamupini a Newcastle Falcons