O suega faaletausaga a le Koneferenisi Aoao Ekalesia Metotisi mo Aoga Aso Sa e pei ona faapolokalameina mai le ofisa tutotonu i Samoa, lea e faia i le masina o Me e laugatasia ai Aoga Aso Sa uma a faasinoti e fia a le ekalesia, ma toe lafoina pepa i Samoa mo le togiina.
O le Vasega 10 o le au faaiuaso lea mo Aoga Aso Sa ina ua ausia tusipasi o lea vasega.
Peitai la i lenei tausaga 2011 ua toe manumalo ai Kalaiesetete i le sili aoao o le Vasega 10 i totonu o le faasinoti a Niu Sila i Saute, ae tulaga lua i le Koneferenisi aoao lea e siamupini ai se tamaitai mai le sinoti a Amerika Samoa.
O le faafā (4) ai lea ona maua e Kalaiesetete le ipu o le sili i le Vasega 10, ma ua tatau ma onomea ona tutu’i mau ma mamanu loa i totonu o lenei matagaluega.
O le tamaitai o Tiresa Lupe Ierome ua faamanuiaina i le tulaga muamua ma o le viiga lea e faafoi atu i le Atua, o le tulaga lua o Moana Leo’o ma James Fata Na’oupu.
E toatolu i latou na sue ma ua faamanuiaina uma i tusipasi auro a le ekalesia.
Na faataunuuina le laugatogi ma tuuina aloaia atu le ipu o le sili aoao a le sinoti mo Tiresa Ierome e le Tausi Matagaluega ia Rev Ale Palelei lea ua siitia atu mo Alaska.
Faamalo atu i alo ma fanau uma a le ekalesia mo le taumafai, ma ia manuia tele suega faaiu o lenei tausaga i totonu o soo se faleaoga ua a’otauina ai outou.
