Ua manumalo le faleaiga o le alii Samoa, le susuga ia Michael Meredith ma lona faletua ia Yosipa, ma ua avea nei ma siamupini, toe numera tasi ia Niu Sila atoa mo le 2011. O se tauvaga e aofia ai uma ai faleaiga ma nofoaga mo taumafa sa faia e se komiti faapitoa, ma na auaufaatasi ai alii faamasino e tuuina le manumalo i le auaunaga a le alii Samoa ma lona toalua, e pei ona ta‘ua.
O Michael sa a‘oa‘oina i le Iunivesite i Aukilani, i mataupu tau kuka (chef). Sa tele foi nisi kamupani ma faleaiga tetele i Niu Sila sa faigaluega ai, a o lei amataina ma faatū lana lava faleaiga e pei ona filifilia ai, ma ua avea ma numera tasi i totonu o le atunuu atoa mo lenei tausaga.
O se tulaga ua maoa‘e ma ua ta‘uta‘ua ai foi tagata Samoa, ma lana tautua i totonu o Niu Sila, e ese mai i le tele o isi agavaa ma tomai faapitoa faifai pea o loo siitia ai le tulaga manuia o Niu Sila i le va ma isi atunuu o le lalolagi, ona o atina‘e ma agavaa faapitoa o tagata Samoa lava.
O se fiafiaga foi lea i le susuga ia Michael ma lona toalua le tamaitai o Yosipa e pei ona sa faamaonia mai e lona toalua le tamaitai o Yosipa Meredith.
O lea nofoaga e i Dominion Rd i Mt Eden, i Aukilani, ma sa molimauina e le Samoa Times le matagofie tele o totonu ma fafo ina ua asiasi i ai.
E lē gata i le mamā, o le faatulagaina o laulau ma nofoa i totonu o le faleaiga, ae sa molimauina foi le lelei tapenaina o gaioiga o taumafa mai lava i le umukuka, agai ane i le faatinoina o isi auaunaga ma le tilivaina mo tagata asiasi ma malo fai ane mo taumafataga.
E 40 tagata e mafai ona tausasami ma taumamafa ma faaaogāina pe afai e manaomia ona mālōlō i ai mo se taumafataga. E lē taugofie le tau o taumafataga, e amata mai i le $90 agai i le $150 a le tagata e toatasi e tausami ai, faatasi ma isi vaega eseese e pei o le uaina ma vai taumafa suamalie.
E lei mamao tele atu foi sa iai se tasi o faaaliga tele sa faia i le fale o mataaga i Aukilani, le Auckland Museum, sa tuufaatasia ai kuka o taumafa ma tofo mai atunuu eseese o le lalolagi sa faatinoina e o latou lava tagatānuu.
O le susuga ia Michael Meredith, sa fai ma sui o Samoa, na te faalauiloa le gaosiga o le oka i‘a a Samoa, faapea le faia ma le kukaina o le keke puaa.
Sa faasoasoaina mo tagata uma sa iai i lea sauniga faapitoa, ma tofo ai ma molimauina ai le matagofie o ia foi taumnafa a le atunuu e pei ona sa faalauiloaina i lea aso. E iai foi nisi o polokalame tau kuka ma tagata kuka a Niu Sila, sa mautulaga ma maitauina ai le taumafai ma le maualuga o le matata, ma le taleni a lenei alo o le atunuu.
O loo iai le susuga ia Michael i Samoa mo se malologa puupuu, peitai o lona toalua o le tamaitai o Yosipa sa maua i ai mo se feiloaiga ma sa faalauiloa ai le tele o vaega sa manaomia.
O loo tapunia foi mo le taimi nei oe faleaiga mo se malologa ma o le a toe tatalaina i le vaiaso nei lava mo taumafataga ma ana paaga masani.