Ua siamupini nei Ausetalia i le Ipu o le soka a Asia 2015 lea e tusa ma le luasefuluono taaloga aofai faatoa sikoa ai foi lea o se au ia Korea i Saute lea na latou saili siamupini ma manumalo ai le Socceroo e 2-1.
O le sao mai o Ausetalia i le sailiga na maualuga ai le sao o le alo o Samoa ia Tim Cahill lea foi ua atoa i ai ma se faailoga uigaese e ono faailoga ai lona sao mo Ausetalia i le tele o tausaga ma le tele o ana sikoa maoae i taaloga mo lona atunuu aemaise i taimi o Ipu a le lalolagi.
E ui na sui i tua i le minute 64 talu ai le afaina i se manu‘aga, ae na tumau pea le faatuatua o lana au lea na maimoaina le lua o ana sikoa i le taaloga ma Saina.
I le sailiga siamupini na semanu e ulu lana kiki muamua i le pusa ae peitai na amata faaletonu mai ai lona aao i lana taumafaiga lenei. Ae o le lototoa o le Soccerro i le iai o Cahill mai le amataga na amata vaaia ai foi le tatala o a latou avanoa auā ua tele ina maka ma mataitu e Korea i Saute Tim i le ‘afa muamua, ae avanoa ai loa isi e pei o Massimo Luongo ma sikoa mataina ai i se pasi mataina a Sainsbury ma sili ai Ausetalia 1-0.
Na sui i tua Cahill ae lavea atu ai loa Robbie Kruse ma Ivan Franjic ma amata osofai Korea i Saute. Pe toe 1 le minute o totoe o le taaloga i taimi faaopoopo ae sikoa loa Korea i Saute ma tutusa 1-1 uma ma le taimi i se osofaiga mataina tele.
Na faaopoopo le 30 minute poo ai lava e sikoa e manumalo, lea na sikoa ai loa Ausetalia mai ia James Troisi mo ‘ai faaiu 2-1 ma siamupini ai loa le Soccerro mo le taimi muamua i le Ipu a Asia.
I totonu o kalapu ma nofoaga matamata na faalogoina ai le vii o Tim Cahill ua alaga e tagata auā o ia lea na taulamua i le faaooina atu o Ausetalia i le Siamupini.
O se taimi mitamita foi mo aiga ma Samoa uma i le lalolagi le faaeaea a lenei alo na uluai taalo mo Samoa i le 1994 ma o loo avea pea ma lupe faalele mo Ausetalia ma Samoa i soo se taaloga e taulamua ai.
I lana faatalatalanoaga ina ua uma le taaloga, na ia saunoa ai sa talitonu lava e manumalo lana au i lenei tauvaga.
