Faalauiloa poloketi e lua a le Matagaluega o Faamasinoga

E lua poloketi a le Matagaluega o Faamasinoga, o le Faamasinoga o Fanua ma Suafa ua faalauiloa auā le malupuipuia o ana faamaumauga.
O poloketi e lua e pei ona faalauiloa e aofia ai le “Tuulaupua o Faamaumauga o Mataupu Tau Faamasinoga o le Faamasinoga o Fanua ma Suafa” ma le “Faamaumauga i masini pu‘e leo o Taualumaga o Faamasinoga uma.”

O le tau o le galuega ua mae‘a ona faatino e $1.8 miliona. E $1,690,332.21 na faatupeina i le fesoasoani a le Malo o Ausetalia ma le $121,219.00 le tupe a le Malo. O lea faamoemoe na faatautaia i luma maota o le Matagaluega i Mulinuu, ma sa auai i ai le Afioga i le Palemia, Susuga Tuilaepa Lupesoliai Dr. Sailele Malielegaoi ma nisi o sui o lana Kapeneta e molimauina lea faamoemoe tāua. O le Afioga i le Minisita o Faamasinoga ma Mataupu Tau Faamasinoga, Afioga Fiame Naomi Mataafa na saunoa i le saunoaga autu o le aso.

O le Tuulaupuaina o faamaumauga mo le Faamasinoga o Fanua ma Suafa na amatalia i le 2011 ma o le faaiuga o le tausaga na mavae atu nei, na mae‘a ai le faamauina o faila e 25,000 i le ofisa i Mulinuu.
Talu ai le naunautaiga o le Matagaluega ina ia malupuipuia ia vaega o le auaunaga, na manatu ai loa le matagaluega ua talafeagai ona amata faaaogā lea auaunaga fou.
Na saunoa le Afioga i le Minisita e faapea, o loo faaauau pea le galuega mo faila i Tuasivi mo le isi 20,000 faila ma e fuafua le Matagaluega o le a mae‘a le vaega lona lua lea, i le isi lua tausaga i se tau pe tusa ma le $900,000.00.

O nei galuega e pei na faailoa e le Afioga i le Minisita, na faavaeina i lalo o le faagasologa o galuega a le Lala o Tulafono ma le Amiotonu a Samoa.
Sa faaopoopo le aufaigaluega a le Matagaluega ina ua amata le poloketi, ma sa faatupeina lava e le poloketi totogi o le aufaigaluega seia oo mai lava i le tausaga faaletupe lenei o loo faagasolo, o le faaopoopo lea a le Afioga i le Minisita.

O le galuega o faamaumauga i masini pu‘e leo o taualumaga o Faamasinoga na amatalia ona faatino i le tausaga talu ai, i le faagasolo lea ona faapipii i potu faamasino o loo iai nei e 12. O le masina o Novema talu ai nei na atoatoa ai lea tapenaga.
O le tau o lea galuega e $150,000. Na faailoa e le Afioga i le Minisita e faapea, o nei galuega e lua, o le a siitia ma faaleleia atili ai le auaunaga a le Matagaluega a Faamasinoga e le gata mo le Faamasinoga ae faapea foi mo le atunuu lautele o loo feagai ma mataupu tau le tulafono.
“Mo le Faamasinoga o Fanua ma Suafa, o le a avea lenei laasaga fou e puipuia atili ai measina a aiga ma aiā tatau faaletulafono a tagata Samoa.”

Peitai i le faamalamalamaga atili o le faaaogāina o lea auaunaga fou e pei ona nafa ma le Ofisa Sili o Pulega, Tofa Masinalupe Tusipa Masinalupe, na ia faailoa ai nisi o vaega e ao ona malamalama ai le mamalu o le atunuu.Na saunoa Masinalupe e faapea, e iai polokalame ua mae‘a ona tuu i totonu o le auaunaga fou lea, e iloa ai e le Matagaluega soo se tagata na mafai ona silasila i lea auaunaga i soo se taimi.
Ua faatapulaa foi i latou e mafai ona nafa ma le faatinoina o lea auaunaga, lea na ta‘ua e le Ofisa Sili o Pulega e na o le 20.

O ituaiga gaioiga e faatino e soo se tagata o le aufaigaluega e faaaogāina ai lea auaunaga fou, o le a iloa uma e le Matagaluega, o le faaopoopo lea a le Afioga i le Ofisa Sili o Pulega a le Matagaluega. E iai aiaiga faapitoa e mafai ai e le mamalu o le atunuu ona silasila i faila o faamaumauga a soo se mataupu na fofogaina i le faamasinoga.
O masini e pei ona faailoa o le a faaaogāina lea auā le pueina o leo, a o faagasolo taualumaga o soo se faamasinoga. Ua iai le faamoemoe o le Matagaluega, o le isi lua tausaga o lumanai o le a mae‘a ai le vaega lona lua o lea poloketi mo Tuasivi.
Ofisa Sili o le Matagaluega o Faamasinoga, Tofa Masinalupe Tusipa Masinalupe, o loo faailoa nisi o fuafuaga a le matagaluega