E ono vaiaso na faataunuu ai sailiga seleni a le autalavou a le Ekalesia Aso Fitu Tutoatasi o le toe afio mai i le pitonuu o Thomastown, o fuafuaga faasavali a le susuga i le faafeagaiga taulagi ia Tavita Stower ma le faletua ia Autalavou mo le lumanai manuia o alo ma fanau a le Ekalesia, aemaise o le tupu ma le ola o lea foi vaega o le galuega.
Na ala eseese le faataunuuina o le faamoemoe, ae o se tasi o laasaga na o latou faatāuaina o le taamilosaga voli polo, na faaalia le lagolago o isi falelotu uma o le Ekalesia i le aai, e ala ia latou auvoli na faaulu ma faagasolo ai loa le taamilosaga mo vaiaso e ono, o se tasi lenei o faagatama o loo fiafia le Ekalesia e unai alo ma fanau e taalo ma faamalositino ai, o le ala foi lea na maitauina ai le taufai lelei uma o autalavou taitasi.
O le faaiuga o le vaiaso na tuanai atu na faaiuina ai le taamilosaga, ma e ui ina sa faigata le sailiga siamupini peitai ua sola ma le autalavou a le susuga i le faafeagaiga ia Auimatagi Feau le Ez Ball le siamupini, na o latou tauaaoina faailoga taumafa faatasi ai ma pulou na saunia ma lagolago ai (sponsor) le kamupani a le Digicel Ausetalia.
Ia tupu ma ola autalavou uma a le Ekalesia i le malosi faaletino ae silisili le faale-Agaga.
