Ua leva ona faasalalau le matagofie o lenei faaaliga o tusitusiga o Pi faitau poo alafapeti ma soo se mataitusi i le City Gallery i Ueligitone, a le susuga ia Joseph Churchward. O se tagata ta‘uta‘ua ona o lona tusia lea o ni mataitusi ua faaaogāina e le lalolagi atoa.
O lenei alii o se graphic designer na soifua mai i Apia i Samoa i le aso 20 o Aokuso 1932. O le 1946 na taunuu mai ai i Niu Sila ma aoaoina i le Miramar South School i Ueligitone i le 1948.
Na maua lona faailoga o le Art Distinction Award i mea tau tusitusiga o mataitusi (lettering) mai le Wellington Technical College ma amata ai lana galuega o se tagata tusiata.
O ia na uluai faatuina le Churchward Internationl Typefaces i le 1969, ma sa faasalalauina i le lalolagi e le kamupani Siamani. O lana pisinisi ua ta‘ua o le Churchward Internal Typesetting (CIT) sa pito sili ona tele i Ueligitone i le 1960.
O le ogatotonu o le 1970 na ia laiseneina ai ni kamupani i Ueligitone lava ma o le 1979 na ia faia ai ni alafapeti se 150. Na toe taliu i Samoa ma faia se fale fou mo ana galuega i le 1988.
E 582 ituaiga mataitusi fou na ia tusia i le 2008 mo lana faaaliga na faia i le falemataaga o Niu Sila i le Te Papa Tongarewa.
O le 2010 na faaeeina i ai le faailoga a le Tupu Tamaitai o Elisapeta (QSM) mo lana tautua i mea tau typography, ae na maliu i le aso 26 o Aperila 2013.
O Joseph o se Samoa, Peretania, Sikotilani, Tonga ma Saina ona tupuaga. E manaia foi ae manatua e le atunuu e maimoa i lana faaaliga o loo faia nei i le Art Gallery i Ueligitone e faagata i le aso 3 o Aokuso.
