E pei lava foi ona masani ai aso fiafia i taaloga a ekalesia a o iai i malologa o le Kirisimasi ma le Tausaga Fou, lea e pei ona iai le taamilosaga taaloga kilikiti a le aulotu St Pauls Pacific Trinity e faataunuuina pea i tausaga uma i lalo o le taitaiina a le susuga i le faifeau Lapana Faletolu.
O lenei faagatama o loo faatautaia e le komiti filifilia o loo taiulu ai le faletua o Fogatuli Andrews faapea le taitai komiti lauiloa o Epati Ieremia.
O le auga lava o lenei faamoemoe o le aumaia lea o tupulaga a le ekalesia e taaalo faatasi i vaitaimi o fiafiaga, faapea foi ma mātua aemaise o malo asiasi mai, e maua ai pea le nonofo fealofani.
Na amataina taamilosaga i le va o au filifilia e lua, Kirisimasi ma Tausaga Fou i le aso 28 Tesema 2010 ma faaiu ai i le aso 4 Ianuari 2011 i le Hagley Park.
Na molimauina le tumutumu tetele o nei taaloga e le gata i tupulaga talavou ma le aulotu ae faapea i malo asiasi mai Samoa ma isi ekalesia.
E maitauina foi e le tusitala le laugatasia o au e lua i latou togiga, aemaise o le mataalia i luga o le malae, e le gata i faatea taavili solo, o le tatagi o olo, o le lelea maualuga o le polo ma le leo lē malolo o le faaili i le faiga o le aoga.
Na faapena foi ona iai se aso faapitoa mo fanau laiti lava latou mo a latou taaloga, aemaise ai o le latou mafutaga faa-Kerisiano e muai faataunuuina i le taeao ona faia lea o taaloga, faatasi ai ma le latou taumafataga i totonu lava o le malae taalo.
Peitai o le afiafi o le Aso Faraile i le Bedford Hall sa taualuga ai le faamoemoe o le ekalesia e ala i le laugatogi ma le tufatufaina o ipu, faatasi ai ma le latou fiafia tele e faauma ai foi taaloga o lenei tausaga aemaise ai o le toe faasauni atu o fanau e a‘e mo aoga.
O le faletua o Fogatuli sa lauina faaiuga o taaloga, ma ua manumalo ai le au a Kirisimasi o loo kapeteni ai le fetalaiga Laufiso Solimalo i le ipu.
I le tausaga talu ai sa siamupini ai Tausaga Fou lea o loo faufautua ai le susuga Lapana Faletolu, ma sa faanoanoa lava si faifeau ina ua malolo lana au.
O nisi faailoga sa tauaaoina e pei o olo silia i alii ma tamaitai, ai silia faapea polo sapo, ma o le alii talavou 13 tausaga o Graham Vaegaau sa mauaina le ipu o le tama taalo tausala o le tausaga, ona tiga le malulu ma puaoa le taeao ae savali lava lenei tama aoga i le malae taalo, sa ia mauaina foi le olo silia i le itupa o alii.
Na faaiu i le taumafataga fiafia, o le susuga Epati Ieremia sa fai ma fofoga o le po, ae o le fetalaiga Laufiso Solimalo, o le failautusi foi lea o le ekalesia sa fetalai e faafetaia le galuega a komiti aemaise o le mamalu o ē na aofia faatasi ma malo asiasi o lea lava afiafi.
O le molimau a le tusitala e tailo foi i ni faatea taavili a Shane Warne pe tutusa ma o a matou tama sasa‘o i Kalaiesetete.
