“A tapasa i le Atua le tatou malaga, e lē ‘asa lau faatautaiga ma lau faatamasoalii, ‘aua ne‘i tapasaina i oa o le lalolagi poo le faamaualuga”, nisi ia o saunoaga i le lauga faaleagaga na fofogaina e le tausi matagaluega mai Halswell o Poasa Leaupepe, o lē sa tofia e taosoina le faigamalaga i le sauniga lotu tuufaatasi a ekalesia eseese sa tauaofia i le malumalu o le EFKS i Woolston i le uluai Aso Sa o Ianuari 2011.
O le sauniga lotu tuufaatasi lenei e faatautaia e le mafutaga a le aufaigaluega i Kalaiesetete lea o loo taitaifono ai le susuga i le tausi matagaluega Ale Palelei, ma e masani lava ona faia i le amataga o le masina o Ianuari e talosia ai le folauga a le nuu, aemaise le malo o Samoa i lenei tausaga fou ua amata. Na taitaia le sauniga e le susuga i le Toeaina Tumama Vili o le EFKS Pulega i Saute.
O alii faifeau na mautofi mo lea lotu faapitoa pei o le susuga Kenneth Fuliese (Ekalesia Aso Fitu Koneferenisi Addington) ma Tuipalusami Mafo‘e (Worship Centre Shirley) sa faitauina le Tusi Paia, faatasi ai ma talosaga na saunia e le Toeaina Fitifiti Luatua (PIC Sailimalo i le Atua Aranui), susuga Lapana Faletolu (St Pauls Pacific Trinity Church) ma le tausi matagaluega Neru Tiatia (Addington).
O le Afioga Patele Paulo sa faapaiaina le taulaga sa aoina, ma na faasolosolo aufaipese eseese mo le lagiiina o viiga o le Atua, saunia lelei pei o le Ekalesia Aso Fitu Koneferenisi, Ekalesia Katoliko, St Pauls Pacific Trinity, EFKS tuufaatasi mai aulotu e fia, faapea le faletolu matagaluega i Kalaiesetete.
O se sauniga tumu, matagofie naua togiga a aufaipese taitasi aemaise o siufofoga mālie ua atili ai ona mafanafana le failauga faapitoa o le aso, faatasi ai ma le laumata fiafia e feiloai ma faamanuia atu le Tausaga Fou i le isi uso tuaoi.
O le laugaina o le upu a le Atua mo le tapasaina o le folauga sa matuā logo faa-Tutuila le aufaafofoga a o alofaiva le susuga Poasa Leaupepe, ua lē gata i le tamalii ma le logomalie o le gagana sa faaaogāina, ae o ana metotia felanulanuai e momoli mai ai le feau faaleagaga. I se saunoaga faaiu a le susuga i le Toeaina Tumama Vili na ia faafetaia le failauga faapitoa mo le tapenaga maeaea, faapea le faamalo‘ulo‘u mai o susuga i faifeau ma faletua aemaise aulotu taitasi i le noonooia i le galuega a le Atua.
E ui lava ina luluina e mafuie e leai se isi o ila ai, auā o le aai maluelue ae tumau pea le faatuatua. Tapasa i le Atua, auā o le Atua o le Malamalama, a tapasa e le Atua ona ta maua lea o measina, folau ia i lagima le malaga o le 2011.
