O le au a le Agape City mai Upper Hutt, ua siamupini nei i le YMAC Youth Tournament mo lenei tausaga, e pei ona sa faia i le Aso Toanai na se‘i mavae atu nei i le Walter Nash Stadium Taita Lower Hutt i Ueligitone, i le taaloga o le volipolo.
E tele ekalesia sa auai a latou auvoli e aofia ai Porirua, Lower Hutt, Ueligitone ma Upper Hutt. O lenei taumafaiga e faamamafa i tupulaga talavou, aemaise ai ulugalii talavou ma soo se tasi lava sa fia auai. Na feailigia le susuga ia Rev Maselino Ah-king Su‘a pe fia le aofai o ana auvoli ae saunoa le faafeagaiga e tusa ma le 4 ana au, e 2 au a tama, 2 au a teine. O le au a tama o loo taitai ai le susuga ia Paula Tala Falefata. O le susuga ia Poseta o le faiaoga na te kolenia au a tama ma teine, ae o le susuga ia Koreta Okeamoa Luamanu o ia lea o le taitai o au teine ae lagolagosua i ai le faletua o le faafeagaiga ia Anasitasia Ah-king, a o le susuga ia Ps Maselino Ah-king Su‘a, o ia foi le faafeagaiga o le auvoli, o ia foi o le faufautua auā tupulaga Samoa mo le lumanai aemaise le tuuina atu o latou soifua mo le Atua.
