E ui i le finau o le Manu Samoa, mo se avanoa e tausinio ai i le taamilosaga o le Super 15, peitai, e foliga mai lava e lē o iai se fuafuaga a le SANZAR e maua se avanoa o Samoa poo se au tuufaatasi foi mai le Pasefika i se taimi lata mai. O le taimi nei o loo talanoaina le faaaopoopo o nisi au se tolu i le Super Rugby, e tasi le au mai Aferika i Saute ma au e lua e lē o mautinoa i le taimi nei, peitai o loo tilofia e le SANZAR ia Amerika ma Kanata ma se au mai Asia mo isi avanoa e lua o loo totoe.
O lea faaiuga a le SANZAR o loo fesiligia e tama taaalo mai le Pasefika e pei o le alii o Mahonri Schwalger lea sa kapeteni i le Manu Samoa i le Ipu o le Lalolagi ua tuanai atu. Na ta‘ua e Mahonri o ia lava le tagata muamua e tuu lona suafa e taalo mo Samoa, poo se au foi mai le Pasefika pe a tupu lea mea. Na ia ta‘ua foi lona lagolagoina o le auai o le Manu Samoa i le Super Rugby, poo se au tuufaatasi a le Pasefika e aofia ai Samoa, Tonga ma Fiti.
I se finagalo faaalia o le CEO o le Iuni Lakapi a Niu Sila le alii o Steve Tew, e tatau ona tele se tapenaga e muamua ona fai, faatoa mafai ona ofi mai le Manu Samoa poo se au mai le Pasefika i le Super Rugby. Na faamanino e Tew e ui lava i le naunau o le SANZAR e aumai se au mai le Pasefika ona o le taleni o loo vaaia i tama taaalo mai Samoa ma le Pasefika, ae faigata i le taimi nei ona o tulaga tau tupe.
Na ia faailoa foi e tatau ona mautinoa e lava se tupe ma ia iai se kamupani malosi e lagolagoina le Manu Samoa poo se au mai le Pasefika pe afai e ofi mai i le Super Rugby.
O le mafuaaga foi lea ua tilofia ai e le SANZAR ia Kanata ma Amerika, auā e lava le tupe e tapena ai se au mai atunuu ia. Ina ua fesiligia le tulaga maulalo o loo iai le lakapi i ia atunuu e faatusa ia Samoa, na ta‘ua e Steve Tew, o lea ua ofi atu au nei e lua i le Pacific Cup ma o se tulaga lelei tele lea, e lē gata i lena o le Super Rugby e lē na o tama taaalo mai Amerika ma Kanata e auai i se au mai atunuu nei, e mafai ona konekalate mai tama taaalo mai isi atunuu e taaalo i se au mai Amerika ma Kanata, o le mafuaaga lena e tāua ai le lava o se tupe e lagolago ai se au e ofi mai i totonu o le Super Rugby.
I se finagalo faaalia lava o Mahonri na ia ta‘ua ai, e iai lava auala e mafai ona fai pe afai e tāua i le SANZAR le sao o au mai le Pasefika. E leai se faigata o le saini o se feagaiga e faamautu ai i Aukilani se au mai le Pasefika auā o loo toatele tagata Pasefika o loo aumau i Aukilani, e maua foi i totonu o Aukilani se nofoaga lelei e aofia ai faletaalo ma se malae e faamautu i ai se au mai le Pasefika.
Na ta‘ua e Steve Tew, e lē na o tupe foi e tāua, ae o le iai o ni tagata lelei e faafoeina ma puleaina se au mai Samoa ma le Pasefika e tāua tele. “O lo matou lava faamoemoe, a aumai se au mai Samoa poo le Pasefika i le Super Rugby ia aumai i se tulaga maualuga ma le tapena lelei i soo se itu, i le taimi nei e talitonu le SANZAR e lē o gafatia e Samoa ma le Pasefika ona pulea ma faafoe se au mo le Super Rugby”.
O loo silasila toto‘a pea le SANZAR i le agai i luma o le Super Rugby, ina ia tutusa le malolosi o au e tausinio auā le maimoaga a le lalolagi, e lē o se mea lelei foi le malosi o le isi au ae vaivai le isi au. O tulaga faapea e aafia tele ai le taaloga ma lē fiafia ai kamupani o loo sasaaina atu tupe e tele e lagolagoina ai le Super Rugby.
I le taimi nei o loo tilofia foi se isi taamilosaga i lalo ifo o le Super Rugby, o au vaivai e taaalo i le taamilosaga lona lua lea, o le au e siamupini e see i luga i le Super Rugby ae see mai i lalo le au sa mulimuli i le Super Rugby, e pei ona faia i Europa i le taamilosaga o le Heniken Cup, lea o loo iai le isi ana taamilosaga e igoa o le Amlin Cup; o le au e siamupini i lea taamilosaga e see i luga i le Heniken Cup.