E lua tausaga o galulue le vaega suesue poo le ausaienisi ale nofoaga o suesuega ale Malo i Nafanua e saili nisi oloa e mafai ona gaosia mai le aano ole talo a Samoa. Na saunoa ma le fiafia le Minisita ole nofoaga o suesuega faasaienisi le susuga Lopaoo Natanielu Mu’a, ile mafai nei ona gaosi le meainu malosi ole uisiki (whiskey) mai le aano ole talo. “Ose galuega fita sa feagai ma le ausuesue ma o alii ma tamaitai oloo feagai ma lenei galuega oni tamafanau ale atunuu ua maualuga lo latou tomai i galuega faapea”.
O Novema ole tausaga ua mavae na amata ona faapala ai le aano ole talo ma e ono ile sefulu lua masina e faia ai lea galuega peitai na saunoa Lopaoo e ofo le aufaigaluega ina ua mae’a le ono masina ae vaaia ua fua mai a latou taumafaiga ini fua lelei ua maua le meainu malosi ole uisiki. “Oloo tuu atu nei i tua ia tatou faipisinisi tuma’oti pe iai se isi poo nisi e mafai ona latou faia lea galuega auā o lea ua mautinoa ua mafai e le talo a Samoa ona gaosia lea oloa tau avamalosi e sili ona taugata i atunuu ole lalolagi”.
Ua saunoa foi Lopaoo afai e leai nisi ole aufaipisinisi e mafai ona faatinoina ole a liliu loa le Malo e faagaioi, peitai e lē o iai se fuafuaga ale Malo e aafia i faiga faapisinisi, ae taatia ia i latou oloo faia lea tautua. E selau paelo oloo faapala ai nei le talo ma ole fuafuaga e pei ona faailoa e le Minisita e oo atu ile onoafe fagu uisiki e maua ai. Ole vaiaso ua tuanai na ave ai se fagu uiski muamua mai le taumafaiga amata, e tofo ai minisita ole Kapeneta. “Ole tala a nai o’u uso a minisita e matautia le lelei ole tatou uisiki mai le talo ma ole tala a Loau ina ua uma ona tofo, ua lava foi a’u ole a ou alu ile fale”. Ole tasi o taumafaiga oloo feagai ma le nofoaga suesue ole sailia lea o auala e mafai ona faaaogā ai le aano ole talo mo le taumafa o chips, ma ua saunoa le Minisita afai ae manuia foi lea sailiiliga ole a mafai foi ona maua se isi maketi fou ole talo, ia lē gata ina ave mata ma tuuaisa lona aano i fafo ae ole a mafai foi ona maua ai le chips poo fries lea e ina’i ai i’a ma moa falai e pei ona faaaogā iai le pateta.
“O taumafaiga uma nei ale Malo mo le lumanai auā o ai na te iloa pe alualu foi le aveina i fafo ole tatou talo ae aafia i nisi faaletonu ae o lea ole a iai nisi oloa e mafai ona gaosi mai ai ma faatau pea i fafo”.
